اسلام آباد۔23جون (اے پی پی):وزیراعظم شہبازشریف ملک اچ قیمتی معدنیات دی تلاش تے حصول کیتے جدید ٹیکنالوجی دے استعمال دی ہدایت کریندے ہوئیں آکھیے جوبجلی دی پیداوارتے ٻیاں صنعتاں اچ استعمال تھیوݨ آلے خام مال دا زیادہ توں زیادہ حصہ مقامی سطح تے پیدا کرتے ملک دا قیمتی زر مبادلہ بچایا ونڄے۔ وزیراعظم آفس دے میڈیاونگ توں جاری بیان موجب اے ڳالھ انہاں وزیربرائے ہاؤسنگ اینڈ ورکس مولانا عبدالواسع دی سربراہی اچ آل پاکستان مائنز اینڈ منرلز ایسوسی ایشن دے وفد نال ڳالھ مہاڑ کریندے ہوئیں آکھی اے جنہاں خمیس کوں انہاں دے نال ملاقات کیتی ۔ ملاقات اچ ملکی سطح تے اعلی کوالٹی دا کولہ، لوہا اتے ٻیاں قیمتی معدنیات دی تلاش تے نکاسی دے نظام کوں عالمی معیار توں ہم آہنگ کرݨ کیتے مختلف تجویز زیر بحث آسن ۔وزیر اعظم ایں مقصد دے حصول کیتے جدید ٹیکنالوجی دے استعمال دی ہدایت کیتی تاں جو بجلی دی پیداوار تے ٻیاں صنعتاں وچ استعمال تھیوݨ آلے خام مال دا زیادہ توں زیادہ حصہ مقامی سطح تے پیدا کرتے ملک دا قیمتی زر مبادلہ بچایا ونڄ سڳے ، وزیر اعظم ایں سلسلے اچ تھر تے لاکھڑا اچ موجود کوئلے دے نال نال میانوالی تےچنیوٹ اچ دریافت شدہ لوہے دے ذخیرے توں بھرپور فیدہ چاوݨ دی ہدایت کیتی ۔ وزیراعظم ملک اچ مائننگ سیکٹر دی ترقی کیتے عملی تجویز بݨا تے وختی توں وختی رپورٹ پیش کرݨ دی ہدایت کیتی ، ایں مقصد کیتے وزارت خزانہ، وزارت توانائی، وزارت پٹرولیم، وزارت صنعت و پیداوار، فیڈرل بورڈ آف ریوینیو تے ٻئے متعلقہ حکام دی کمیٹی تشکیل ݙیوݨ دی ہدایات جاری کیتیاں ، ملاقات اچ وزیر توانائی انجینئرخرم دستگیر، وزیر اعظم دے مشیر احد چیمہ ،وزیر مملکت خزانہ ڈاکٹر عائشہ غوث پاشا ، چیرمین فیڈرل بورڈ آف ریوینیو عاصم احمد تے ٻئے اعلی سرکاری حکام شرکت کیتی۔
