اسلام آباد۔28جون(اے پی پی)وفاقی کابینہ قومی پالیسی برائے انتظام مہلک فضلہ دی منظوری ݙتی اے جیندے نال پلاسٹک اتے ٻئے خطرناک الیکٹرانک مواد دی درآمد کیتے محدود اجازت ہوسی اتے ایندے کیتے ہک لائسنس جاری کیتا ویسی، مہلک فضلہ اچ موبائل دی بیٹریاں اتے ݙوڄھے برقی آلات شامل ہین اتے اے فیصلہ ماحول کوں صاف ستھرا کرݨ کیتے چاتا ڳئے تاں جو وفاق اتے صوبیاں اچ انوائرمنٹ پروٹیکشن ایجنسیز کوں فعال کیتا ونڄ سڳے۔ اے ڳالھ کابینہ اجلاس دے بعد وفاقی وزیر اطلاعات و نشریات مریم اورنگزیب، وزیراعظم دے مشیر برائے امور کشمیر و گلگت بلتستان قمر زمان کائرہ اتے وفاقی وزیر موسمیاتی تبدیلی شیری رحمان میڈیا بریفنگ اچ آکھی۔ شیری رحمان آکھیا جو پاکستان اچ سالانہ 80 ہزار ٹن خطرناک فضلہ بیرون ملک توں درآمد تھیندے جیڑھا ری سائیکل کرݨ لو استعمال تھیندے اتے ایندی وݙی مقدار ساݙے دریاواں، آبی وسائل اتے قدرتی وسائل کوں نقصان پچیندے۔ انہاں آکھیا جو اگلے مرحلے اچ ایں سانڳے ہیک قومی ایکشن پلان وی ٻݨایا ویسی۔ انہاں آکھیا جو اے پالیسی جی ایس پی پلس، ماحولیاتی تحفظ کیتے مدد گار ہوسی جیندے کیتے قانون سازی کیتی ویسی۔
