اسلام آباد۔29جون (اے پی پی):صدر مملکت ڈاکٹر عارف علوی آکھیے جو قوماݨ دی تعمیر اچ اداریں دا کلیدی کردار اے ، ٹیکنالوجی دا حصول ہی جدید علوم تئیں پڄݨ دا ذریعہ اے ، عہد حاضراچ علم دے حصول دے تقاضے تکھے ودھدے پئن ۔ ایوان صدر دے پریس ونگ توں جاری بیان موجب صدر مملکت اے ڳالھ فیصل ائیر بیس کراچی اچ 35 ویں ائیر وار کورس دی گریجویشن تقریب توں خطاب کریندے ہوئیں آکھی اے ۔ صدرمملکت آکھیے جو دنیا دا ہر مسئلہ مشاورت نال طے تھی سڳدے ، عزم تے جذبہ توں قوماں بݨدن، افرادی قوت قومی ترقی دی پوڑھی اے۔ انہاں آکھیے جمہوریت دیاں علمبردارقوماں مہاجرین دے معاملے اچ غیرسنجیدہ ہن، تعصب توں بالا تر تھی تے ترقی دیاں منزلاں پار کیتیاں ونڄ سڳدن ، مسلم امہ اخلاقی اقدارتے یقین رکھیندی اے ۔ صدر ڈاکٹر عارف علوی ایں ڳالھ تے زور ݙتے جو اساکوں بلا رنگ و نسل تے امتیاز دے مظلوماں دی حمایت جاری رکھݨی ہوسی، ترقی دے حصول اچ انسانیت دا پہلو مقدم ہووݨاں چاہیدے ۔ انہاں آکھیے قوماں حادثاتی طورتے ترقی نی کریندیاں ایں کیتے طویل جدوجہد لازم اے، مصنوعی ذہانت جیہے علوم توں ہم آہنگ تھیوݨ ویلھے دی لوڑھ اے تقریب اچ صدر مملکت گریجویٹ تھیوݨ آلے افسران اچ سنداں ونڈیاں ۔ گریجویٹ تھیوݨ آلیں اچ 70 افسران تے دوست ملکاں دے 18 افسر شامل ہن جنہاں اچ سعودی عرب، بنگلہ دیش، سری لنکا، انڈو نیشیا، ملائشیا، شام اتے یمن دے دے افسر ہن۔
