اسلام آباد۔1جولائی (اے پی پی) وفاقی وزیراطلاعات تے نشریات مریم اورنگزیب دی صدارت سرکاری اشتہارات دی ونڈ اچ شفافیت یقینی ٻݨاوݨ بارے وݙے فیصلے کیتے ڳئن، صرف باقاعدگی نال شائع تھیوݨ آلے اخبارات تے جرائد کوں اشتہارات جاری کیتے ویسن۔ ذرائع دے مطابق ایں اجلاس اچ وفاقی سیکریٹری اطلاعات شاہیرہ شاہد، پرنسپل انفارمیشن آفیسرمبشر حسن سودھے ٻئے اعلیٰ حکام موجود ہن۔ اجلاس اچ فیصلہ کیتا ڳیا جو اشتہارات دی ونڈ، اخباراں تے جرائد دی اشاعت دی تعداد بارے ڈیجیٹل نظام آندا ونڄے۔ اجلاس کوں اخباراں تے جرائد دی اشاعت دی فہرست ’’اے بی سی‘‘ بارے بریفنگ ݙتی ڳئی۔ اجلاس اچ قومی تے علاقائی اخبارات تے جرائد دی اے بی سے بارے جامع پالیسی ٻݨاوݨ تے غور کیتا ڳیا۔
