اسلام آباد۔4جولائی (اے پی پی):وفاقی وزیر قومی صحت عبدالقادر پٹیل آکھیے جو ملک اچ کورونا وائرس دے کھنڈݨ تے تشویش اے جو گزریل 24 گھنٹے اچ مثبت کیسز دی شرح 4.6 تھی ڳئی اے تے ہسپتالاں اچ 176 مریضاں دا ودھارا تھئے۔ پریس کانفرنس کریندے ہوئیں انہاں آکھیے جو ایں صورت حال توں گھبراوݨا کائنی بلکہ احتیاط دی لوڑھ اے ۔حکومت پہلے ہی کورونا توں بچݨ دے ایس او پیز جاری کرݙتن ، ایں ایس او پیز تے عملدرآمد کوں یقینی بݨایا ویسی ، انہاں آکھیے سندھ اچ کیسز دی شرح ودھ ڳئی اے ، حکومت سندھ نال ایں سلسلے اچ ڳالھ تھئی اے ، کیسز دی زیادہ تعداد کراچی توں سامݨے آئی اے۔ انہاں ٹیسٹنگ تے زور ݙیندے ہوئیں آکھیے جو بوسٹر ڈوز دے عمل کوں تکھا کرݨ دا فیصلہ کیتا ڳئے ، اساں پہلے ہی 10 لکھ دی تعداد کوں پڄدے پیوں ۔ وفاقی وزیر آکھیے روزانہ این سی او سی دے اجلاس اچ کورونا دی صورتحال دا جائزہ ڳھدا ویندے ۔ انہاں صوبیں کوں آکھیے جو آپݨیاں سہولتاں تیار رکھن ، ملک اچ ݙو وݙے مذہبی اجتماعات عیدالاضحیٰ اتے محرم آندے پئن، چھٹیاں اچ تفریحی جاہواں تے رش پوندے ۔ انہاں عوام توں اپیل کیتی اے جو ایں دوران سوشل ڈسٹنسنگ دا خیال رکھن، ماسک پاون تے سینیٹائزر دا استعمال کرن، اساکوں ݙرݨ دی بجائے احتیاط کرݨی اے ۔
