اسلام آباد۔4جولائی (اے پی پی):وزیراعظم شہبازشریف جگلوٹ سکردو روڈ (جے ایس آر) دی بندش دا نوٹس گھندے ہوئیں شاہراہ وختی کھولݨ تے ملکی و غیرملکی سیاحواں دی ݙیکھ بھال تے ضروری چیزاں دی فراہمی یقینی بݨاوݨ کیتے فوری انتظامات دی ہدایت کیتی اے ۔ سنوار کوں وزیراعظم میڈیا آفس توں جاری بیان موجب وزیراعظم پہاڑی تودے ڈھݨ توں تورمک دی جاہ تے بند شاہراہ وختی کھولݨ تے فرنٹئیر ورکس آرگنائزیشن (ایف ڈبلیو او) کوں ہنگامی اقدامات دی ہدایت کیتی اے ۔ وزیراعظم ہدایت کیتی اے جو اضافی مشینری تے افرادی قوت استعمال کیتی ونڄے ، رستہ وختی کھولیا ونڄے ، ملکی و غیرملکی سیاحواں دی ݙیکھ بھال تے ضروری چیزاں دی فراہمی یقینی بݨاوݨ کیتے فوری انتظامات کیتے ونڄن ۔ وزیراعظم ہدایت کیتی جو سیاحواں دی آمد توں گلگت بلتستان اچ ضروری چیزاں دے استعمال اچ ودھارا تھی ویندے ، لہٰذا چیزاں دی قلت نہ تھیوݨ ݙتی ونڄے۔ وزیراعظم علاقے دے کاروباری حضرات ، آبادی تے سیاحواں کوں پیش آندی مشکلات وختی مکاوݨ دی ہدایت کیتی تے آکھیے جو عیدالاضحیٰ دی وجہ توں لوکاں آپݨے گھراں کوں وی آوݨا اے، ایں کیتے کم دی رفتار تکھی کیتی ونڄے، ودھ سارے مینھ تے پہاڑی تودے ڈھݨ توں گزریل ݙو ہفتے اچ 6 ݙینھ شاہراہ بند ہئی ۔ جگلوٹ سکردو روڈ گلگت بلتستان کوں تیل تے کھاوݨ پیوݨ دیاں چیزاں دی فراہمی تے آمدورفت دا واحد زمینی رستہ اے۔ مختلف ملکان نال تعلق رکھݨ آلے سیاح مختلف پروازاں دے ذریعے گلگت بلتستان آندے پئن ۔ گلگت بلتستان دے ہوٹلز تے سیاحت دے شعبے نال جیڑے لوکاں وزیراعظم توں شاہراہ دی طویل بندش تے نوٹس گھنݨ دا مطالبہ کیتا ہئی ۔
