اسلام آباد۔5دسمبر(اے پی پی)بھارت اچ مسلم تاریخی ورثا، عبادت گاہیں اتے مقدس ڄاہیں خطرے وات آ ڳین جتھاں انتہا پسند ہندواں بابری مسجد شہید کرݨ دے 30 سال بعد اپݨے ہندوتوا ایجنڈے تے ٹردے ہݨ تاریخی تاج محل کوں وی اکھ اچ پا ڳھدے اتے کوڑا دعویٰ کیتے جو تاج محل ہندودور اچ شروع تھیا ہا، ایں سانڳے نریندر مودی دی حکمران جماعت بھارتیہ جنتا پارٹی (بی جے پی) دے ہک متعصب رہنما ہک رٹ وی دائر کیتی اے جو تاج محل دی “حقیقی تاریخ دا مطالعہ” کرݨ کیتے فیکٹ فائنڈنگ کمیٹی ٻݨائی وںجے تاں جو یونیسکو دے ثقافتی ورثے دی ڄاہ تاج محل کوں ہندو ورثہ قرار ݙویڄے۔
ایودھیا اچ بی جے پی دے میڈیا سربراہ رجنیش سنگھ اپݨی درخواست اچ آکھیے جو اینڄھا کوئی “سائنسی ثبوت” کائنی جو مغل بادشاہ شاہ جہاں ہی “تاج محل” ٻݨایا ہا۔ بھارتی عدالت دے فیصلے دے باوجود کئی بی جے پی رہنما سالاں توں غیر تاریخی دعوے کریندے آندن جو تاج محل ہندو ترکہ اے جیڑھا مغل بادشاہ شاہ جہاں دور توں وی پہلے ٻݨیا ہا۔
ہندوتوا نظریے دے نال نال آر ایس ایس پورے بھارت اچ مسلم حکمراناں دیاں تاریخی یادگاراں کوں مٹاوݨ کیتے اڳو ہین، ایں سانڳے بھارتی شہراں دے مسلم ناں وٹاوݨ اتے 36 ہزار توں ودھ مسیتاں دی ڄاہ تے مندر ٻݨاوݨ دی مہم زور تے ہے، انہاں شہراں اچ علی گڑھ، دیوبند، فرخ آباد، بدایوں، سلطان پور، فیروز آباد اتے شاہجہاں پور شامل ہین۔ یوپی حکومت پہلے ہی فیض آباد دا ناں ایودھیا اتے الہ آباد دا پریاگ راج رکھ چکی اے۔
مودی دے ٻانہہ ٻیل اتے یوپی دے وزیر اعلیٰ یوگی آدتیہ ناتھ مسلم پس منظراضلاع اتے علاقیاں دے ناں وٹا تے مسلم سنڄاݨ مٹاوݨ دی کوششاں اچ ردھے ہوئن، 2017 اچ ونئے کٹیار، جیڑھے اوں ویلھے بی جے پی دے راجیہ سبھا دے رکن ہن، دعویٰ کیتے جو اے یادگار اصل اچ ہک شیو مندر اے جیندا ناں ‘تیجو مہالیہ’ اے، جیکوں “اصل اچ” ہک ہندو حکمران ٻݨایا ہا۔
تاج محل دے اڄوکے واقعہ 6 دسمبر 1992 کوں تاریخی بابری مسجد دی شہادت دے پھٹ ولا کھول ݙتن۔ رام جنم بھومی موومنٹ دے صدر ایل کے ایڈوانی دی اڳواݨی اچ ایودھیا اچ بابری مسجد دی شہادت بی جے پی اتے آر ایس ایس دے ایں دعویٰ کوں تکڑا کرݨ ہا جو ایودھیا اچ مندر اوں ڄاہ تے ٻݨایا ڳیا ہا جتھاں ہندو دیوتا بھگوان رام ڄمیئے ہن۔ ہندو قوم پرست گروپ وشوا ہندو پریشد (آر ایس ایس دے ذیلی گروپ) دے ترجمان شری راج نائر آکھیے جو اے ہک وݙی کامیابی ہئی، مودی دے ݙوڄھے دور حکومت اچ بابری مسجد دی شہادت اچ ملوث سارے ملزمان کوں سی بی آئی دی خصوصی عدالت بری کر ݙتا ہا اتے کوئی ثبوت نئیں منیے۔
بابری مسڄد توں علاوہ وی 17 ویں صدی دی گیانواپی مسجد جیڑھی مغل بادشاہ اورنگزیب ٻݨائی ہئی بارے آکھیا ڳئے جو اے وشویشور مندر تے ٻݨی ہئی جتھاں 2021 اچ فساد کھنݙیا ہا جو 5 تریمتیں درؤخاست دائر کر تے مسجد اچ نماز پڑحݨ دی اجازت منڳی ہئی، اے ہک درخواست ہݨ ودھ تے 15 انڄھو انڄھ درخواستاں تئیں پڄ ڳئی اے جو لوکاں مسیت شہید کر تے اتھاں مندر ٻݨاوݨ دا مطالبہ کیتے، بابری مسجد توں بعد ہݨ لڳدا ایویں اے جو مودی حکومت دی منشا تے عدالتاں ہندواں دے حق اچ فیصلہ ݙیسن۔
1669 اچ مغل شہنشاہ اورنگ زیب دے دور اچ متھرا اچ ٻݨائی گئی شاہی عیدگاہ مسجد کوں وی کیشو دیو مندر تے ٻݨاوݨ دا دعویٰ سامݨے آئے۔ ہندو گروپ جامع مسجد شمسی بارے وی آہدن جو اے نیل کنٹھ مہادیو مندر ݙھوا تے ٻݨی ہئی۔ بدقسمتی نال ایں سارے معاملے تے عالمی برادری بھارت اچ بی جے پی دی اڳواݨی اچ ودھدے ہندوتوا، مسلماناں اتے ٻیاں اقلیتاں دے خلاف انسانی حقوق دی ڄاݨ ٻڄھ تے خلاف ورزیاں تے اکھیں مندری پئی اے، بھارت اچ مسلماناں دے تاریخی ورثہ اتے املاک دی حفاظت کیتے عالمی سطح تے اقدامات دی لوڑھ اے۔
