پاکستان وسطی ایشیائی ریاستاں نال دیر تئیں تے نتیجہ خیز رابطے چاہندے ،سپیکر قومی اسمبلی راجہ پرویز اشرف

اسلام آباد۔12دسمبر(اے پی پی):سپیکر قومی اسمبلی راجہ پرویز اشرف آکھیے جو پاکستان اپݨی ’’سنٹرل ایشیاء وژن‘‘ پالیسی دے ذریعے وسطی ایشیائی ریاستاں نال دیر تئیں تے نتیجہ خیز رابطے قائم کرݨ چاہندے ،پاکستان سارے وسطی ایشیائی ریاستاں بالخصوص قزاخستان نال سانجھی دلچسپی دے سارے امور تے تعاون کوں مزید ودھاوݨ کیتے کم کریندا پئے ۔ اے ڳالھ انہاں پارلیمنٹ ہاؤس اچ قزاخستان دی ایوان زیریں (قزاخستان پارلیمنٹ دی مجلس) دے چیئرمین یرلان کوشانوف دی قیادت اچ پاکستان دا دورہ کرݨ آلے قزاخستان دے پارلیمانی وفد نال ڳالھ مہاڑ کریندے ہوئیں آکھی اے ۔ ایں موقع تے ڈپٹی سپیکر قومی اسمبلی زاہد اکرم درانی تے وفاقی وزیر شازیہ عطا مری وی موجود ہن ۔ سپیکر آکھیے پاکستان دی (سینٹر ایشیا وژن ) پالیسی دا بنیادی جُزو خشکی اچ پتھی وسطی ایشیائی ریاستاں کوں بندر گاہواں تئیں سوکھی رسائی ݙیوݨ اے ۔ پاکستان وسطی ایشیائی ریاستاں کوں سوکھے تے تھوڑے رستے دے ذریعے باقی دنیا نال رلاوݨ دا اہم ذریعہ اے ۔ سپیکر قومی اسمبلی چیئرمین یرلان کوشا نوف دا انہاں دی دعوت تے پارلیمانی وفد دے رلے پاکستان دا دورہ کرݨ تے شکریہ ادا کیتا۔ انہاں ایں اعتماد دا اظہار کیتے جو قزاخستان دے ایوان زیریں پارلیمان وفد دا اڄوکا دورہ ݙو طرفہ تعاون کوں مزید ودھاوݨ بالخصوص پارلیمانی سطح تے رابطے کوں مستحکم بݨاوݨ اچ اہم ثابت تھیسی ۔ انہاں آکھیے ایں دورے نال ݙوہیں پارلیماناں دی فعال شراکت داری توں جاری منصوبیں کوں احسن طریقے نال توڑ پڄاوݨ اچ مدد ملسی جیں توں تجارت، سیاحت اتے عوامی سطح تے رابطیں اچ ودھارا تھیسی ۔ چیئرمین یرلان کوشانوف سپیکر قومی اسمبلی دا شکریہ ادا کریندے ہوئیں اڄوکے سیلاب توں پاکستان اچ تھیوݨ آلے جانی تے مالی ضیان تے ݙکھ تے افسوس کیتا ۔ انہاں آکھیے ݙوہیں ملکاں وچال تعلقات مشترکہ مذہب ،تاریخ اتے ثقافت دے لازوال رشتے تے جڑیے پئن جیں دا گزریل 30 سالاں اچ پارلیمانی اتے سفارتی تعلقات مزید مضبوط تھئن ۔