اسلام آباد۔13دسمبر(اے پی پی):سپیکر قومی اسمبلی راجہ پرویز اشرف آکھیے جو آئین پاکستان اچ قومی اداریں دے خلاف ہرزہ سرائی اتے انہاں دے سربراہان دی تضحیک دی ممانعت اے،امید اے جو حکومت ایں سلسلے اچ آپݨے فرائض توں آگاہ اے تے او کہیں کوں انہاں دی تضحیک دی اجازت نہ ݙیسی جݙاں جو پبلک اکائونٹس کمیٹی دے چیئرمین نور عالم خان آکھیے قومی اداریں دی تضحیک کرݨ آلے شخص دا دماغی معائنہ کرایا ونڄے۔ منڳل کوں قومی اسمبلی اچ اعتراض دے نکتے تے پبلک اکائونٹس کمیٹی دے چیئرمین نور عالم خان آکھیے وفاقی حکومت اتے این ڈی ایم اے جنہاں علاقیں اچ سیلاب آئے اتھاں دے ارکان کوں اعتماد اچ ڳھدا ، میݙا حلقہ چارسدہ اتے چترال وی سیلاب توں متاثر تھئے ۔ سندھ اچ ضیان تھئے ، اتھاں صوبائی حکومتاں تے پی ڈی ایم اے ارکان کوں اعتماد اچ ڳھدا ، جنوبی پنجاب اتے کے پی کے صوبائی حکومتاں تے انہاں دی قیادت کہیں قسم دا تعاون نی کیتا تے نہ اساں نال مشاورت کیتی ۔ خیبرپختونخوا تے پنجاب حکومتاں اساکوں نہ صرف نظر انداز کیتے بلکہ ٹارگٹ کیتے ۔ ساݙے خلاف کوڑے مقدمے بݨیندے پئن ساݙیاں زمیناں تے قبضے کیتے ویندے پئن ۔ دوست محمد مزاری تے پیو ݙاݙے دی ترائے چار سو سال پراݨی زمین تے کیس بݨایا ڳئے انہاں کوں حبس اچ رکھیا ڳئے ۔ انہاں صوبائی حکومتاں دے دائرہ اختیار اچ ساݙا ٹرݨ پھرݨ محال اے ۔ انہاں آپݨی سیاست کیتے مسلح افواج دے سپہ سالار کوں نی بخشیا ۔ جیڑھا بندہ معزز ججاں ، اداریں دے سربراہان کوں نی بخشیندا او اساکوں کتھاں بخشیسی ۔ اساکوں وفاقی حکومت توں ڳلہ اے جو اداریں دے خلاف ڳالھیں کرݨ آلے بندے دے خلاف آرٹیکل سکس دے تحت کارروائی کیوں نی کیتی ویندی ۔ سپیکر راجہ پرویز اشرف آکھیے جو پاکستان دا آئین ایں ڳالھ کوں یقنی بݨیندے جو قومی اداریں دے خلاف ہر قسم دی ہرزہ سرائی دی ممانعت اے‘ میکوں یقین اے جو حکومت اپݨے فرائض توں آگاہ اے اتے او قومی اداریں دی تضحیک دی کہیں کوں اجازت نہ ݙیسی ۔
