اسلام آباد۔17دسمبر (اے پی پی):وزیراعظم شہباز شریف عوام کوں مہانگ توں ݙیواوݨ کیتے سیاسی استحکام کوں بنیادی شرط قرار ݙیندے ہوئیں آکھیے جو پاکستان نال وفاداری اتے یاری دا تقاضا اے جو ملک اچ معاشی استحکام ہووے،نینگراں کوں روزگار ݙیواوݨ کیتے سیاسی بے روزگاراں توں نجات لازم اے،قوم کوں سوچݨا ہوسی جݙاں جݙاں ملک معاشی ترقی دے پاسے ٹرݨ شروع تھیندے تاں فسادی لشکر کیوں متحرک تھی ویندے ؟انہاں آکھیے کوئی شک نی رہیا ، ھک ایجنڈے دے تحت معاشی تباہی کیتی ڳئی ۔ ہفتے کوں وزیر اعظم میڈیا ونگ توں جاری بیان موجب وزیراعظم شہباز شریف آکھیے جو کہیں دی کوشش اے جو پاکستان ڈیفالٹ کروںجے تاں ایویں نہ تھیسی تے نہ کرݨ ݙیسوں ،معیشت دی بنیاداں اچ بارودی سرنگاں وچھاوݨ آلے ہݨ سیاسی نظام دیاں بنیاداں اچ بارودی سرنگاں وچھاوݨ دی سازش کریندے پئن ،جیویں آئین دی طاقت نال ملک کوں کوڑی تے راشی حکومت توں نجات ݙیوائی ہئی ، ہݨ عوام کوں روٹی، روزگار دی پریشانیاں توں نجات ݙویسوں ،سیاسی شرپسند انتشارکھنڈا تے دنیا کوں ݙساوݨ چاہندن جو پاکستان اچ سرمایہ کاری نہ کرو تے سیلاب متاثرین اپݨے گھراں اچ آباد نہ تھیون ۔ وزیر اعظم آکھیے سیلاب متاثرین کوں پالا ، بھک اتے بیماری توں بچاوݨ اچ سیاسی شریراں دا کوئی حصہ کائںی ، اے سیاسی مطلب پرست اتے خودغرض ہن۔ عوام دا اعتماد ونڄاوݨ آلے ہݨ اسمبلیاں ترڑیندے پئن ، مقصد سیاسی عدم استحکام پیدا کرݨا اے ۔ وزیر اعظم آکھیے پاکستان دے عوام دی حالت تے رحم کرو، مہانگ، بے روزگاری دے عذاب توں انہاں کوں نجات ݙیواوݨ سیاست اے،پاکستان سابق چار سال دی معاشی تباہی توں زہرناک مہانگ دا شکار تھئے ۔ عوام دی زندگی توں اے زہر ختم کرݨ ݙیو ، رکاوٹاں نہ کھڑیاں کرو ۔ سیاسی استحکام اتے میثاق معیشت ہی پاکستان دی قومی سلامتی کوں تکڑا کرسڳدن۔
