پاکستان تے ازبکستان پلانٹ قرنطینہ دے شعبے اچ تعاون کوں مضبوط بݨاوݨ تے اتفاق

اسلام آباد۔27دسمبر(اے پی پی) وزارت قومی غذائی تحفظ تے تحقیق اتے جمہوریہ ازبکستان دے ٻوٹیں دے تحفظ اتے قرنطینہ دی ایجنسی ٻوٹیں دے قرنطینہ دے شعبے اچ تعاون کوں مزید مضبوط بݨاوݨ تے اتفاق کیتے ۔ ایں سلسلے اچ وزارت اچ ھک تقریب دا انعقاد کیتا ڳئے جیں اچ وفاقی وزیر قومی غذائی تحفظ اتے تحقیق طارق بشیر چیمہ، سیکرٹری قومی غذائی تحفظ اتے تحقیق ظفر حسن اتے ڈائریکٹر ٹیکنیکل قرنطینہ ڈیپارٹمنٹ آف پلانٹ پروٹیکشن محمد شہزاد سہیل وی شرکت کیتی ۔جمہوریہ ازبکستان دے ٻوٹیں دے تحفظ اتے قرنطینہ دے ڈائریکٹر جنرل ایجنسی ابراہیم ایرگاشیف ازبکستان دی نمائندگی کریندے ہوئیں ݙوہیں ملکاں وچال کیڑیں تے قابو پاوݨ دے اقدامات دے طریقہ کار کوں بہتر بݨاوݨ تے اتفاق کیتا۔ ݙوہیں ملکاں دی نیشنل پلانٹ پروٹیکشن آرگنائزیشنز سیمینارز اتے ٹریننگز دے ذریعے تجربات دا تبادلہ کریسن تے ݙوہیں ملکاں وچال برآمدی تجارت تے ہم آہنگی ودھیسن ۔ انہاں اقدامات توں زرعی کیڑیں تے قابو پاوݨ تے کیڑیں دے خطرے تے ضیان کوں گھٹ کرݨ اچ مدد ملسی ۔معاہدے دے تحت، وزارت قومی غذائی تحفظ اتے تحقیق تے جمہوریہ ازبکستان دے ٻوٹیں دے تحفظ اتے قرنطینہ دی ایجنسی رل تے کم کریسی تاں جو ݙوہیں ملکاں وچال ٻوٹیں دی مصنوعات دے تجارتی حجم کوں ودھاوݨ کیتے ھک سازگار ماحول پیدا کیتا ونڄ سڳے ۔ تقریب اچ فریقین ایں ڳالھ دی تعریف کیتی جو پاکستان ازبک انار، ٻیر، پنڈوں، انجیر، انگور اتے ازبکستان پاکستانی امب تے وسل کوں آپݨی منڈیاں تئیں رسائی ݙتی اے ۔ایں توں انڄ پاکستان دے ماہرین فائٹو سینیٹری سسٹم، پروڈکشن سائٹس، پروسیسنگ اداریں تے پیکنگ ہاؤسز دا موقع تے معائنہ کیتے ازبکستان دا دورہ کریسن ۔