ملک دے اُتلے اَدھلے علاقیں اچ مینھ وسݨ تے برف باری پاروں پالہ ودھݨ دا امکان

اسلام آباد۔27دسمبر(اے پی پی) نیشنل ڈیزاسٹر منیجمنٹ اتھارٹی 28 توں 29 دسمبر تئیں ملک دے اُتلے تے اَدھلے علاقیں اچ مینھ تے برف باری پاروں موسم پالے دی شدت ودھݨ دا امکان ظاہر کیتے ۔ ایں حوالے نال محکمہ موسمیات دی پیشگوئی موجب بلوچستان دے شمال مغربی علاقیں اچ مغربی ٹھڈیاں ہوائیں دا نظام داخل تھی چکیے جیں پاروں 28 توں 29 دسمبر تئیں ملک دے اُتلے تے اَدھلے علاقیں اچ پالے دا موسم ودھ سڳدے۔

این ڈی ایم اے دی طرفوں جاری تفصیل موجب ایں موسمی نظام دے زیر اثر 27 توں 29 دسمبر دے دوران، بلوچستان دے علاقیں خصوصاً کوئٹہ، ژوب، بارکھان، زیارت، نوکنڈی، دالبندین، ہرانی، قلعہ سیف اللہ، قلعہ عبداللہ، چمن، پشین، گوادر، جیوانی، تربت، پنجگور، قلات، خضدار، سبی، نصیر آباد اتے لسبیلا اچ مینھ وسݨ دے نال پہاڑاں تے برفباری متوقع ہے۔ایں توں انڄ 28 اتے 29 دسمبر دی رات کشمیر، گلگت اچ وی ہلکا مینھ وسݨ تے پہاڑاں تے برف پووݨ دا امکان اے۔  بلتستان، چترال، دیر، سوات، مالاکنڈ، کوہستان، مانسہرہ، ایبٹ آباد، ہری پور، مردان، پشاور، چارسدہ، باجوڑ، کرم، وزیرستان، کوہاٹ، سرگودھا، اسلام آباد، مری، گلیات تے پوٹھوہار ریجن اچ کݨ مݨ دا امکان اے ۔ ایں ویلھے سکھر، لاڑکانہ، جیکب آباد، ڈیرہ غازی خان، راجن پور، گوجرانوالہ، سیالکوٹ، لاہور، شیخوپورہ، فیصل آباد، ملتان، بہاولپور، رحیم یار خان اتے بھکر اچ وی مینھ وسݨ دا امکان اے ۔