صدر مملکت وفاقی ہسپتال دے 37 ملازمین کوں کورونا ہیلتھ رسک الائونس ݙیوݨ دے حکم دی توثیق کرݙتی

اسلام آباد۔28دسمبر(اے پی پی) صدر مملکت ڈاکٹر عارف علوی وفاقی ہسپتال دے 37 ملازمین کوں کورونا ہیلتھ رسک الائونس ݙیوݨ دے حکم دی توثیق کریندے ہوئیں رسک الائونس ݙیوݨ کیتے تازہ سمری پی ایم سیکرٹریٹ بھیڄݨ دا حکم برقرار رکھیے ۔ ایوان صدر دے پریس ونگ موجب صدر مملکت وفاقی محتسب دے حکم دے خلاف وزارت قومی صحت خدمات دی اپیل مسترد کرݙتی۔ نیشنل انسٹی ٹیوٹ آف ری ہیبلی ٹیشن میڈیسن (نِرم) اتے فیڈرل گورنمنٹ سروسز ہسپتال دے 37 ملازمین کوں نان کلینیکل قرار ݙے تے الائونس توں محروم کرݙتا ڳیا ہئی ، مقبول احمد اتے ٻئے شکایت کنندگان الائونس نہ ملݨ تے وفاقی محتسب کوں شکایت کیتی ہئی ۔ شکایت کنندگان دا موقف ہئی جو او محکمیں دے سربراہان دی ہدایت تے خطرے دے باوجود کورونا وائرس دی وبا اچ فرائض انجام ݙیندے رہیے ، ٻہوں سارے ملازمین کوں کورونا رسک الائونس ادا کیتا ڳئے جݙاں جو انہاں کوں نان کلینیکل سٹاف قرار ݙے تے امتیازی سلوک کیتا ڳئے ۔ شکایت کنندگان دے مطابق کلینیکل اتے نان کلینیکل ملازمین یکساں طور تے آپݨے ہسپتالاں اچ ڈیوٹی سرانجام ݙیندے رہیے۔ فیصلے موجب اگست 2021 اچ وزارت وفاقی سرکاری ہسپتالاں؍ اداریں دے طبی عملے کوں کورونا ہیلتھ رسک الائونس ݙیوݨ کیتے فنڈز ݙتے ، فیڈرل گورنمنٹ پولی کلینک پوسٹ گریجویٹ میڈیکل انسٹی ٹیوٹ اسلام آباد وی مستفید تھیوݨ آلیں اچوں ھک ہئی ، 2020 اچ سارے ملازمین کوں کورونا رسک الائونس ݙتا ڳئے جݙاں جو 2021ءاچ 37 ملازمین کوں نان کلینیکل قرار ݙے تے الائونس توں محروم کرݙتا ڳیا ۔ فیصلہ اچ قرار ݙتا ڳیا جو کلینیکل اتے نان کلینیکل عملہ ھکو جیہے خطرے آلے ماحول اچ کم کریندے ، ایگزیکٹو ڈائریکٹر ایجنسی دے باقی 37 ملازمین کوں الائونس ݙیوݨ دی سفارش کیتی۔ صدر مملکت ، وزارتِ صحت دی اپیل بدانتظامی ثابت تھیوݨ تے مسترد کرݙتی ۔