پی ٹی آئی دے استعفیں دی تصدیق دے حوالے نال آئین ، قانون اتے قومی اسمبلی دے قواعد وضوابط دے مطابق فیصلہ کیتا ویسی ، سپیکر قومی اسمبلی

اسلام آباد۔29دسمبر(اے پی پی) سپیکر قومی اسمبلی راجہ پرویزاشرف آکھیے پاکستان تحریک انصاف(پی ٹی آئی) دے استعفیں دی تصدیق دے حوالے نال آئین ، قانون اتے قومی اسمبلی دے قواعد وضوابط دے مطابق فیصلہ کیتا ویسی ، استعفیں دی تصدیق کیتے پی ٹی آئی دے سارے ارکان کوں انفرادی طور تے سݙیا ویسی ۔ پی ٹی آئی دے وفد سپیکر قومی اسمبلی راجہ پرویز اشرف نال پارلیمنٹ ہائوس اچ سابق سپیکر اسد قیصر دی سربراہی اچ ملاقات کیتی۔ وفد اچ سابق ڈپٹی سپیکر قاسم خان سوری، ملک عامر ڈوگر، امجد خان نیازی ، فہیم خان ، ڈاکٹر شبیر حسن ، لعل ملہی ، عطا اللہ تے طاہر اقبال شامل ہن۔ ملاقات اچ پی ٹی آئی دے قومی اسمبلی توں استعفیں دے معاملے تے ڳالھ مہاڑ کیتی ڳئی ۔ ایں موقع تے ڳالھ مہاڑ کریندے ہوئیں سپیکر قومی اسمبلی راجہ پرویزاشرف آکھیے سیاست اچ دروازے بند نی کیتے ویندے بلکہ سیاست داناں دے درمیان رابطے تھیوݨے چاہیدن ۔ انہاں آکھیے استعفیں دی تصدیق تے آئین ، قانون اتے قومی اسمبلی دے قواعد وضوابط دے مطابق فیصلہ کیتا ویسی تے پی ٹی آئی دے سارے ارکان کوں انفرادی طور تے سݙیا ویسی ۔ انہاں آکھیے پہلے وی پی ٹی آئی دے ارکان کوں استعفیں دی تصدیق کیتے سݙیا ڳیا ہئی ۔ راجہ پرویز اشرف دا آکھݨ ہئی جو پی ٹی آئی دے کراچی توں ھک رکن اسمبلی استعفے دی منظوری روکݨ کیتے ہائیکورٹ نال رجوع کیتا ہئی۔