چھیکڑی سیلاب زدہ بندے دی بحالی تئیں آرام نال نہ ٻہساں ، جنیوا اچ سیلاب زدگان دی پکار کوں ھک واری ول پوری دنیا تئیں پڄیسوں، وزیراعظم شہباز شریف

اسلام آباد۔29دسمبر(اے پی پی) وزیراعظم محمد شہباز شریف اپݨے وعدے کوں پورا کرݨ دے عزم دا اعادہ کریندے ہوئیں آکھیے جو میں بطور خادمِ پاکستان چھیکڑی سیلاب زدہ بندے دی بحالی تئیں آرام نال نہ ٻہساں ،آندے مہینے جنیوا اچ سیلاب زدگان دی پکار کوں ھک واری ول پوری دنیا تئیں بھر پور طریقے نال پڄیسوں ۔ وزیراعظم آفس دے میڈیا ونگ توں جاری بیان موجب وزیرِاعظم شہباز شریف دی زیرِ صدارت آندے مہینے جنیوا اچ منعقد تھیوݨ آلی’’ ریزیلیئنٹ پاکستان‘‘ کانفرنس دے حوالے نال جائزہ اجلاس تھیا جیں اچ وفاقی وزرا اسحاق ڈار، سردار ایاز صادق، احسن اقبال، شیری رحمن، مریم اونگزیب، وزیرِ مملکت خارجہ امور حنا ربانی کھر، معاونینِ خصوصی سید طارق فاطمی، جہانزیب خان، سید فہد حسین اتے متعلقہ اعلی حکام شرکت کیتی ۔اجلاس کوں جنیوا اچ منعقد تھیوݨ آلی کانفرنس دے حوالے نال تجاویز اتے تفصیلی لائحہ عمل دا مسودہ پیش کیتا ڳیا ۔ اجلاس کوں ݙسایا ڳیا جو کانفرنس اچ دوست ملکاں دے نال نال ڈویلپمنٹ پارٹنرز تے بین الاقوامی مالیاتی اداریں دی شرکت وی متوقع اے ۔ اجلاس توں خطاب کریندے ہوئیں وزیراعظم محمد شہباز شریف آکھیے پاکستان اچ موسمیاتی تبدیلی پاروں اڄوکے سال سینکڑاں جاناں تے ارباں ڈالر دا دا ضیان تھئے ،سیلاب زدگان دی بحالی اتے تباہ شدہ انفراسٹرکچر دی تعمیر پاکستان جیہے ترقی پذیر ملک کیتے ھک وݙا چیلنج اے۔ انہاں آکھیے میں وعدے دے مطابق بطور خادمِ پاکستان آخری سیلاب زدہ بندے دی بحالی تئیں آرام نال نہ ٻہساں ،آندے مہینے جنیوا اچ سیلاب زدگان دی پکار کوں ھک واری ول پوری دنیا تعیں بھر پور طریقے نال پڄیسوں ۔وزیرِ اعظم کانفرنس دے لائحہ عمل کوں ترجیحی بنیاداں تے حتمی شکل ݙیوݨ دی ہدایت کیتی ۔