اللہ تعالی نویں سال کوں پاکستان ، پاکستانی قوم ، عالمِ اسلام اتے ساری دنیا کیتے باعث رحمت و برکت بماوے ، صدر مملکت ڈاکٹر عارف علوی

اسلام آباد۔یکم جنوری (اے پی پی):صدر مملکت ڈاکٹر عارف علوی سال 2023 دے آغاز تے پوری پاکستان قوم تے عالمی برادری کوں مبارخ ݙیندے ہوئیں آکھیے جو نویں سال دے شروع اچ میں اللہ تعالیٰ دے حضور دعا کرینداں جو او ایں سال کوں پاکستان ، پاکستانی قوم ، عالم ِ اسلام اتے ساری دنیا کیتے باعث رحمت و برکت بݨاوے تے دنیا کوں امن و آشتی تے ترقی و خوشحالی نصیب فرماوے۔ ایوان صدر میڈیا ونگ توں ہفتے کوں جاری بیان اچ صدرمملکت ڈاکٹر عارف علوی آکھیے گزریل سال پاکستانی قوم کوں مختلف چیلنجز دا سامݨا رہیا، مگر اساں آپݨی محنت ، بہادری ، ایثار، عزم اتے مستقل مزاجی دی بدولت اوکھے حالات توں نکلیے ۔ انہاں آکھیے کورونا وائرس دی وبا تے کامیابی نال قابو پاوݨ دے بعد پاکستان کوں ملک دے طول و عرض اچ تاریخی سیلاب دا وی سامݨا کرݨا پیا ۔ صدر مملکت آکھیے میکوں سیلاب زدہ علاقیں دا دورہ کرݨ تے اتھاں تھیوݨ آلے ضیان دا جائزہ گھنݨ دا موقع ملیا ، میں اوکھ اچ پتھی پاکستانی عوام نال ملیا انہاں دے مسئلے سݨیے، سیلاب دے دوران جتھاں میکوں مختلف مسئلے ، ضیان تے سیلاب دی تباہی ݙیکھݨ کوں ملی، اتھاں میں آپݨی قوم دی ثابت قدمی ، ایثار، حب الوطنی ، یکجہتی ، عزم اتے استقلال کوں وی ݙٹھا ۔ صدر ڈاکٹر عارف علوی مزید آکھیے پاکستان کوں مسئلیں توں کڈھݨ تے ترقی رے رستے ٹورݨ کیتے اساکوں آپݨیاں انہاں صلاحیتاں کوں بروئے کار گھن آوݨ دی لوڑھ اے ۔ پاکستان کوں اڄ مختلف معاشی مشکلات ، سیاسی عدم استحکام، امن و امان دی صورتحال، دہشتگردی دی ول سر چیندی عفریت، موسمیاتی تبدیلیاں، غربت اتے وھدی آبادی جیہے چیلنجز دا سامݨا اے ۔ انہاں آکھیے نویں سال اچ اساکوں قوم کوں پیش آندے انہاں مسئلیں تے قابو پاوݨ کیتے بحیثیت قوم اپݨی ترجیحات دا درست طور تے تعین کرݨا اے ۔اساکوں ملک کوں ھک خوشحال، ترقی یافتہ، جمہوری اتے مستحکم ملک بݨاوݨ کیتے قومی یکجہتی، اتحاد، نظم و ضبط، مسلسل محنت، جذبے اتے لڳن نال کم کرݨا اے ۔ صدر مملکت آکھیے نواں سال ایں ڳالھ دا متقاضی اے جو اساں ھک مضبوط اتے مستحکم پاکستان کیتے جمہوری اداریں دی فعالیت، اثر انگیزی اتے کارکردگی اچ ودھارا یقینی بݨاؤں، اساکوں آپݨے اداریں دی کاردکردگی اچ ودھارے کیتے متعلقہ قوانین اتے قواعدوضوابط اچ اصلاحات متعارف کراوݨ دی لوڑھ اے ۔ ڈاکٹر عارف علوی مزید آکھیے ملکی ترقی کیتے ایں سال سارے سٹیک ہولڈرز کوں آئین دی پاسداری، انصاف دی فراہمی، شفافیت، کارکردگی اچ ودھارا ، میرٹ دی پابندی تے عوامی شکایتاں دے وختی ازالے کوں یقینی بݨاوݨ کیتے عملی اقدامات کرݨے ہوسن۔ اساکوں سیلاب زدگان دی مکمل بحالی تے معاشرے دے کمزور طبقیں کوں غربت توں کڈھݨ کیتے آپݨیاں کوششاں کوں تکھا کرݨا پوسی ۔ انہاں آکھیے ھک جامع معاشرے دا قیام خصوصی لوکاں تے تریمتاں دی معاشرے اتے کاروباری تے سماجی سرگرمیاں اچ شمولیت دے بغیر ممکن کائنی ۔ نویں سال دے آغاز تے پاکستان کوں ھک پرامن، خوشحال تے اسلام دے زریں جمہوری اصولاں تے مبنی ھک اسلامی فلاحی ریاست بݨاوݨ دے پاسے سفر دی شروعات کرݨ دا عہد کروں ۔ انہاں اللہ تعالیٰ توں دعا کیتی جو او انہاں مقصد دے حصول اچ ساݙا حامی و ناصر ہووے تے سال 2023 کوں پاکستان کیتے ترقی ، استحکام اتے امن و امان دا سال بݨاوے۔