وزارت خارجہ 2023ء دے دوران مختلف عالمی ،علاقائی فورمز، ملٹی نیشنل اداریں دے نال ݙوطرفہ تعلقات دی وسعت ،استحکام کیتےاقدامات کریسی ، وزیر خارجہ بلاول بھٹو دا نویں سال تے ویڈیو پیغام

اسلام آباد۔1جنوری(اے پی پی) وزیر خارجہ بلاول بھٹو زرداری قوم کوں نویں سال دی مبارخ ݙیندے ہوئیں آکھیے جو وزارت خارجہ 2023ء دے دوران مختلف عالمی ، علاقائی فورمزاتے ملٹی نیشنل اداریں دے نال ݙو پاسے تعلقات دی وسعت اتے استحکام کیتے اقدامات کریسی ، ساݙی اتحادی حکومت دی خارجہ پالیسی دا بنیادی مقصد پاکستان دیاں یاریاں ودھاوݨ اے ، اساں پاکستان دے مفادات دا دفاع تے نمائندگی کرݨ ڄاݨدوں ، کاپ کانفرنس دی میزبانی نہ صرف پاکستان بلکہ ترقی پذیر ملکاں کیتے وی چنڳی ڳالھ اے ، پاکستان واحد ملک اے جیں ایف اے ٹی ایف ایکشن پلان کوں ویلھے توں پہلے مکمل کیتا ۔ آپݨے ھک ویڈیو پیغام اچ انہاں آکھیے اڄوکے سال اقتصادی سفارتکاری تے زورݙتا ویسی تاں جو پاکستان دےجی ایس پی پلس سٹیٹس دی تجدید تھی سڳے جیں توں یورپی یونین دے ملکاں دی منڈیاں تئیں رسائی اچ بہتری آسی ، جی ایس پی پلس دی سہولت دے بعد یورپی یونین کوں کیتی ونڄݨ آلی قومی برآمدات اچ 80 فیصد ودھارا تھئے ۔ وزیر خارجہ نے دفتر خارجہ دی طرفوں پوری قوم کوں نویں سال دی مبارخ ݙیندے ہوئیں آکھیے ساݙے سفارتکار، افسران ، وزارت خارجہ دے حکام اتے سفارتخانیں اچ کم کرݨ آلے سارے لوک ݙینھ رات محنت کریندے پئن تاں جو پاکستانیاں دے مسئلیں کوں ممکن بݨایا ونڄ سڳے تے انہاں دی بھرپور نمائندگی کیتی ونڄ سڳے۔ بلاول بھٹو زرداری آکھیے ساݙی اتحادی حکومت دی خارجہ پالیسی دا بنیادی مقصد پاکستان دیاں یاریاں ودھاوݨ تے پاکستان دے پراݨے یاراں نال ݙوطرفہ تعلقات اچ بہتری گھن آوݨ اے ، ایویں پاکستان نویں یار وی بݨیسی تے انہاں نال بہترین تعلقات بݨیسی تاں جو پاکستان دے عوام کیتے بہتری گھن آئی ونڄ سڳے تے انہاں تعلقات توں عوام کوں فیدہ پڄے۔