اقوام متحدہ اپݨی ساکھ بحال کرݨ چاہندی اے تاں جموں کشمیر بارے اپݨی قرارداداں تے عملدرآمد کراوے،کل جماعتی حریت کانفرنس

اسلام آباد۔4جنوری(اے پی پی):کل جماعتی حریت کانفرنس آزاد جموں و کشمیر و پاکستان آکھیے جو اقوام متحدہ اپݨی ساکھ بحال کرݨ چاہندی اے تاں اینکوں چاہیدے جو او جموں کشمیر دی اپݨی قرارداداں تے مزید کوئی دیر کیتے عملدرآمد کراوے۔ ٻدھ کوں کل جماعتی حریت کانفرنس آزاد کشمیر و پاکستان دے کنوینئر محمود احمد ساغر، جنرل سیکرٹری شیخ عبدالمتین اتے سیکرٹری اطلاعات امتیاز وانی اسلام آباد توں جاری ھک مشترکہ بیان اچ آکھیے جو اے 5جنوری 1949 دا ݙینھ ہئی جݙاں اقوام متحدہ دی سلامتی کونسل ھک تاریخی قرارداد منظور کیتی جیندے اچ آکھیا ڳئے جو ریاست جموں و کشمیر دا فیصلہ آزادانہ اتے غیر جانبدارانہ استصواب رائے دے جمہوری طریقے نال کیتا ویسی لیکن ست ݙھاکیں تں ودھ عرصہ لنگھ ڳئے ایں تے عمل درآمد نی تھیا ۔انہاں افسوس دا اظہار کیتے جو اقوام متحدہ اپݨی قرارداداں تے عمل درآمد کیتے کوئی ٹھوس کردار ادا نی کیتا جیں توں بھارت کوں کشمیریاں دی منصفانہ جدوجہد کوں فوجی طریقے نال کچل ݙیوݨ دی شہ ملی۔ انہاں آکھیے بھارت 10 لکھ توں ودھ فوجیاں کوں تعینات کر تے کشمیر کوں ھک وݙی جیل اچ بدال ݙتے ، بھارتی فوجیاں کوں کشمیریاں کوں قتل کرݨ دا لائسنس ݙتا ڳئے تے او مقبوضہ علاقے اچ انسانیت کوں آپݨے ٻوٹاں تلے داپھی ویندن ۔انہاں آکھیے 1989 توں ہݨ تئیں ھک لکھ توں ودھ کشمیریاں دی شہادت، 150 ہزار توں ودھ عمارتاں دی تباہی اتے 13 ہزار توں ودھ کشمیری تریمتاں دی بے حرمتی ایں ڳالھ دا واضح ثبوت اے جو بھارت کیجھے بہیمانہ طریقے نال کشمیریاں کوں مکاوݨ تے انہاں دی سرزمین تے قبضہ کرݨ تے تلیا ہویا اے ۔ آر ایس ایس دی قیادت آلی مودی حکومت 5 اگست 2019 دے بعد نہتے کشمیریاں تے ظلم دے سبھے سابقہ ریکارڈ بھن ݙتن ۔