کنٹرول لائن دے ݙوہیں پاسوں اتے پوری دنیا اچ رہݨ آلے کشمیریاں یوم حق خود ارادیت منایا

اسلام آباد۔5جنوری (اے پی پی) کنٹرول لائن دے ݙوہیں پاسوں اتے پوری دنیا اچ رہݨ آلے کشمیریاں یوم حق خود ارادیت منایا جئیں اچ انہاں اپݨی جدوجہد آزادی کوں ایندے چھیکڑی انجام تئیں پجاوݨ تئیں جاری رکھݨ دا عزم کیتا۔ اے ݙینھ مناوݨ دی اپیل کل جماعتی حریت کانفرنس کیتی ہئی۔ وفاقی دارالحکومت اسلام آباد اچ اقوام متحدہ دے آبزور مشن گروپ اچ سیکرٹری جنرل اقوام متحدہ دے ناں حریت کانفرنس ولوں قرارداد پیش کیتی ڳی۔ کشمیر ہائوس اچ حق خود ارادیت بارے سیمینار تھیا جئیں اچ صدر آزاد کشمیر بیرسٹر محمود چوہدری اتے ٻئے خطاب کیتا۔ صدر، وزیراعظم، وزیر خارجہ سودھے ٻئے اہم رہنماواں دے یوم حق خود ارادیت بارے سنیھے نشر، ٹیلی کاسٹ اتے براڈ کاسٹ کیتے ڳے۔ جموں تے کشمیر، آزاد کشمیر، پاکستان اتے دنیا دے سارے وڈے دارالحکومتاں اچ احتجاجی مظاہرے، ریلیاں، سیمینار کرایا ڳیا۔ اقوام متحدہ اتے عالمی برادری تے زور ڈتا ڳیا جو او تنازعہ کشمیردے حل کیتے اپݨی قرارداداں تے عملدرآمد کراوے۔ اقوام متحدہ دی سلامتی کونسل 5جنوری 1949کوں ہک قرارداد منظور کیتی ڳی ہی جئیں اچ اقوام متحدہ دی زیر نگرانی رائے شماری دے ذریعے کشمیریاں کوں اپݨے مسئلے دا فیصلہ خود کرݨ دا موقع ݙیوݨ دے حق کوں منیا ڳیا ہئی۔ کل جماعتی حریت کانفرنس دے چیئرمین مسرت عالم بٹ ، شبیر احمد شاہ ، محمد یاسین ملک ، آسیہ اندارابی اتے نعیم احمدخان سودھے ہزاراں کشمیری بھارتی جیلاں اچ قید ہن اتے ٻہوں اوکھ اچ ہن۔ ۔راولپنڈی آرٹس کونسل اچ تصویری نمائش رکھی ڳی جئیں دی مزمان خصوصی حریت رہنما کی اہلیہ مشعال حسین ملک ہن۔ حریت رہنما فاروق رحمانی دی کتاب دی تقریب رونمائی وی کیتی ڳی۔