عوامی فلاحی منصوبیاں کیتے ودھ چڑھ تے اقدامات کیتے ویسن، پچھلی حکومت ملک اچ توانائی بحران پیدا کیتے، عمران خان ملک دی معیشت، معاشرے اتے سماج کوں تباہ کیتے، وزیراعظم محمد شہباز شریف دا ہزارہ الیکٹرک سپلائی کمپنی دے قیام دی تقریب توں خطاب

اسلام آباد۔6جنوری (اے پی پی) وزیراعظم محمد شہباز شریف آکھیا جو عوامی فلاحی منصوبیاں کیتے ودھ چڑھ تے اقدامات کیتے ویسن، پچھلی حکومت ملک اچ توانائی بحران پیدا کیتے، عمران خان ملک دی معیشت، معاشرے اتے سماج کوں تباہ کیتے۔ ایں توں ودھ تے منافق، محسن کش، بے دید اتے ناشکرا انسان نی ݙٹھا، عمران نیازی سی پیک دا نقصان کیتے،چین سودھے ٻے دوستاں کوں ناراض کیتے، پاکستان دیوالیہ کائنا تھیسی، آئی ایم ایف دی ٹیم جلدی پاکستان دا دورہ کریسی۔ اے ڳالھیں انہاں جمعے کوں ہزارہ الیکٹرک سپلائی کمپنی دے قیام دی تقریب توں خطاب کریندیں ہوئیں آکھی۔ ایں موقع تے وفاقی وزیر بجلی انجینئر خرم دستگیر خان، مسلم لیگ (ن) دے صوبائی صدر انجینئر امیر مقام، وفاقی وزیر مرتضیٰ جاوید عباسی، سابق رکن قومی اسمبلی کیپٹن (ر) محمد صفدر وی خطاب کیتا اتے تقریب اچ سردار محمد یوسف، سردار شاہجہاں یوسف، سینیٹر پیر صابر شاہ، اورنگزیب نلوٹھہ، آفرین خان، بلدیاتی نمائندے اتے مسلم لیگ (ن) دے عہدیداران وی موجود ہن۔ وزیراعظم آکھیا جو ہزارہ سودھے ملک اچ سوئی گیس دے ارباں روپے دے منصوبے فنڈز دستیاب ہووݨ دے باجود خراب تھیندے پے ہن انہاں کوں پورا کرݨ دا حکم ݙتے، انہاں کیتے رکھیے ڳے فنڈز لاتے ونجن۔ تقریب توں خطاب کریندیں ہوئیں وفاقی وزیر پارلیمانی امور مرتضیٰ جاوید عباسی کمپنی دے قیام تے وزیراعظم دا شکریہ ادا کریندیں ہوئیں اکھیا جو جݙاں وی مسلم لیگ ن حکومت اچ آئی اوں ترقیاتی منصوبیاں دا ڄال وچھائے۔ہزارہ الیکٹرک سپلائی کمپنی دے قیام دی منظوری 2018ء اچ ݙتی ہئی اتے اینکوں گزریل حکومت روکے رکھیا، اساں ہݨ اینکوں ممکن ٻݨائے۔ ایں تے ہزارہ ڈویژن دی عوام دے منتخب نمائندیاں ولوں تساݙا شکریہ ادا کرینداں۔