اسلام آباد۔30جنوری(اے پی پی):چیئرمین سینیٹ محمدصادق سنجرانی، ڈپٹی چیئرمین سینیٹ سینیٹر مرزا محمد آفرید ی، قائد ایوان سینیٹ سینیٹر اسحاق ڈار اتے قائد حزب اختلاف سینیٹ سینیٹر ڈاکٹر شہزاد وسیم پشاور اچ پولیس لائنز دی مسیت اچ دھماکے دی شدید الفاظ اچ مذمت کریندے ہوئیں آکھیے دہشت گرد اپݨے مذموم مقاصد اچ کامیاب نی تھی سڳدے ، پوری قوم دہشت گردی دے خلاف یک جان اے۔سینیٹ سیکرٹریٹ توں جاری بیان موجب چیئرمین سینیٹ محمد صادق سنجرانی آکھیے دہشت گرد اپݨے مذموم مقاصد اچ کݙاہیں کامیاب نی تھی سڳدے ۔ دہشت گردی دے خلاف پاکستان دی حکومت، سکیورٹی اداریں، عوام اتے پارلیمان دا عزم غیر متزلزل اے۔ دہشت گردی دے واقعات ساݙے حوصلے جھکے نی کرسڳدے ۔ دہشت گرد تخریبی کارروائیاں توں پاکستان اچ ترقی دے عمل کوں سبوتاژ کرݨ دی ناکام کوشش کریندے پئن ۔ پاکستان دہشت گردی کوں منڈھوں مکاوݨ کیتے پر عزم اے۔ چیئرمین سینیٹ دھماکے اچ زخمی تھیوݨ آلیں دی وختی صحت یابی کیتے دعا کیتی ۔
