قوم عمران خان دی پالیسیاں دا خمیازہ بھوڳیندی پئی اے ، ݙو توں ترائے سال اچ پاکستان کوں آپݨے پیراں تے کھڑا کرݨ دے قابل تھی ویسوں ،احسن اقبال

اسلام آباد۔30جنوری(اے پی پی) وفاقی وزیر ترقی و منصوبہ بندی احسن اقبال آکھیے اڄ قوم نااہل اتے اناڑی عمران خان دی پالیسیاں تے آئی ایم ایف نال معاہدہ دا خمیازہ بھوڳیندی پئی اے ݙو توں ترائے سال اچ پاکستان کوں آپݨے پیراں تے کھڑا کرݨ دے قابل تھی ویسوں ۔ آپݨے ٹویٹ اچ انہاں آکھیے 2018 دے انتخابات اچ آکھیا ہئی جو کون اناڑی کوں موٹر سائیکل دی چابی ݙیسی ،عمران خان اناڑی ہئی تے انکوں ملک تے ٻلھا ݙتا ڳئے اوں آپݨا سر وی پھاڑیا ،پاکستان دا وی انجر پنجر کرتے چھوڑ ڳئے ،اڄ اساں کنے او ٹکڑے ٹکڑے تھئی معیشت پئی اے جیں دے حالات اساں بھوڳیندے پیوں ۔ اساں جݙاں اپوزیشن اچ قومی اسمبلی اچ ہاسے ، آکھدے ہن عمران خان جیڑھا کم کریندا پئے ایندا خمیازہ کئی سال پاکستان کوں بھوڳݨا پوسی ،ہݨ ملک تباہ کرتے خود مزے اچ ٻیٹھے ۔انہاں آکھیے ساݙی ذمے واری اے جو اساں ملک کوں آپݨے پیراں تے کھڑا کریسوں لیکن ایندے اچ وقت لڳسی 2013 اچ 16 گھنٹے بجلی نہ آندی ہئی جݙاں اساں حکومت چھوڑی تاں بجلی پوری کرتے ڳئے ہاسے ۔ میکوں یقین اے ݙو ترائے سالاں اچ پاکستان کوں آپݨے پیراں تے کھڑا کرݨ دے قابل تھی ویسوں ۔