اسلام آباد۔31جنوری(اے پی پی):وفاقی وزیر منصوبہ بندی، ترقی و اصلاحات پروفیسراحسن اقبال اڄ دے ڈیجیٹل دور اچ نجی اتے حکومتی ماہرین دے درمیان مشاورت اتے شراکت داری کوں یقینی بݨاوݨ دی ہدایت کریندے ہوئیں آکھیے جو نجی شعبے اتے ماہرین دی مشاورت اتے صلاح قومی منصوبیں دی بہترین معیار تے تشکیل اتے تکمیل کیتے ناگزیر اے۔اے ڳالھ انہاں منڳل کوں اتھاں وزارت منصوبہ بندی دے داخلی منصوبیں تے چاتے ڳئے خصوصی اقدامات دے جائزہ اجلاس دی صدارت کریندے ہوئیں آکھی اے ۔ اجلاس اچ سیکرٹری وزارت منصوبہ بندی، چیف اکانومسٹ، ممبران پلاننگ کمشن اتے پراجیکٹ ڈائریکٹر شرکت کیتی تے منصوبہ جات تے بریفنگ ݙتی۔اجلاس اچ ای فائیوفریم ورک، آؤٹ لک 2035، انٹرن شپ پروگرام، 20 پسماندہ ترین ضلعیں کیتے خصوصی منصوبہ جات اتے سیلاب زدہ علاقیں دی بحالی کیتے خصوصی اقدامات اتے موجودہ صورتحال دا جائزہ ڳھدا ڳیا ۔اجلاس اچ وزارت منصوبہ بندی کنے منظوری کیتے صوبائی حکومتاں تے وفاقی وزارتاں دی طرفوں پیش کیتی ڳئے پی سی ون اتے فیزیبلٹی رپورٹس تے نجی شعبے توں صلاح گھنݨ دا مؤثر طریقہ کار اختیار کرݨ دا فیصلہ کیتے ۔ احسن اقبال ہدایت کیتی جو اڄ دے ڈیجیٹل دور اچ نجی تے حکومتی ماہرین دے درمیان مشاورت اتے شراکت داری یقینی بݨائی ونڄے ۔
