اسلام آباد۔2فروری (اے پی پی) پاکستان آکھیا جو او فلسطینی عوام دے حق خودارادیت دی جائز جدوجہد دی پوری حمایت کریندا رہسی۔ دفتر خارجہ دی ترجمان ممتاز زہرا بلوچ خمیس کوں پریس بریفنگ اچ آکھیا جو پاکستان اقوام متحدہ اتے او آئی سی دی متعلقہ قرارداداں دے مطابق 1967 توں پہلے دی سرحداں اتے القدس الشریف کوں فلسطین دا دارالحکومت ٻݨاوݨ دے نال نال ہک قابل عمل، خودمختار فلسطینی ریاست دے مطالبے دی حمایت کریندے۔ ترجمان فلسطین دے مختلف شہراں اچ نہتے شہریاں دی شہادت دی مذمت کریندیں ہوئیں اسرائیلی قابض افواج دی غیر قانونی دراندازیاں اتے ظالمانہ اقدامات کوں بند کرݨ دا وی مطالبہ کیتا۔ انہاں آکھیا جو فلسطینی عوام دے انسانی حقوق دا احترام کیتا ونڄے۔ ترجمان آکھیا جو پاکستان ڈنمارک اچ قرآن پاک دی بے حرمتی دے گھناؤنے اتے جارحانہ فول دی سخت ترین الفاظ اچ مذمت کیتی۔ اساں اپݨی تشویش ڈنمارک دے حکام تئیں پڄا ݙتی اے۔ اساں ایجھی کاروائیاں کوں نسل پرستی، زینو فوبک اتے اسلامو فوبک سمجھدوں۔ پاکستان کوں دنیا اچ ودھدے ہوئے اسلاموفوبیا تے تشویش اے کیونجو مذہبی نفرت کھنڈاوݨ اتے مسلم اقلیتاں دے خلاف تشدد تے اکساوݨ کیتے اظہار رائے دی آزادی دا بے دریغ استعمال کیتا ویندا پے۔
