اسلام آباد۔3فروری (اے پی پی) بھارتی جیل اچ بند کشمیری حریت رہنما یاسین ملک دی اہلیہ مشعال حسین ملک مطالبہ کیتے جو پاکستان یاسین ملک سودھے جیلاں اچ بند حریت قیادت دی رہائی اتے مقبوضہ کشمیر اچ انسانی حقوق دی سنگین خلاف ورزیاں تے عالمی عدالت انصاف ونڄے، یو این اچ متنازعہ حیثیت ختم اتے آبادی اچ تبدیلی تے نویں قرارداد، کشمیر انوائے مقرر کیتا ونڄے، دنیا دا امن کشمیر دے پر امن حل نال جڑیے، ہندوستان اندر سول وار امدی پی اے، وݙی سرمایہ کاریاں وی ایں سول وار دی نذر تھی ویسن۔ او جمعےکوں وزارت اطلاعات تے نشریات دے ذیلی ادارے ڈائریکٹوریٹ آف الیکٹرانک میڈیا اینڈ پبلیکیشنز (ڈی ای ایم پی) ولوں یوم یکجہتی کشمیر بارے انفارمیشن سروسز اکیڈمی اچ تھیوݨ آلی ݙٰنھ دی دی ڈیجیٹل فوٹوگرافک اینڈ پینٹنگ نمائش دی افتتاحی تقریب توں خطاب کریندیں پی ہن۔ ایگزیکٹو ڈائریکٹر جنرل ڈائریکٹوریٹ آف الیکٹرانک میڈیا اینڈ پبلیکیشنز طارق محمود ، اے پی ایچ سی راہنما عبدالحمید لون ، ڈائریکٹر فلم آصف الرحمان ، ڈپٹی ڈائریکٹر فلم اینڈ ایگزبیشن فارینہ مغل سمیت وزارت اطلاعات تے نشریات دے حکام تقریب اچ شریک تھیے۔ ایگزیکٹو ڈائریکٹر جنرل ڈی ای ایم پی طارق محمود نمائش بارے شرکا کوں ݙسیا جو ڈائریکٹوریٹ آف الیکٹرانک میڈیا اینڈ پبلیکیشنز جامعات دے طلبا و طالبات ولوں ٻݨائی ڳی آزادی تحریک بارے پینٹنگز مقابلیاں اچ بہترین فن پاریاں کوں اڄ نمائش کیتے رکھیا ڳے اتے ڈائریکٹوریٹ آف الیکٹرانک میڈیا اینڈ پبلیکیشنز ولوں ٻݨائی ڳی “کشمیر بلیک آئوٹ”اتے”سٹوری آف کشمیر ” دستاویزی فلماں اتے یوم یکجہتی کشمیر بارے”کشمیر ہمارا ہے ” دے عنوان نال نغمے دا اجرا کیتے۔ اے وی ایں نمائش دا حصہ ہن۔
انہاں آکھیا جو مشعال حسین ملک اڄ ایں نمائش اچ تحریک آزادی کوں چنڳے انداز اچ اجاگر کیتے۔ انہاں آکھیا جو مقبوضہ جموں تے کشمیر اچ قیامت دا منظر اے ، اساں اپݨی نویں نسل کوں ݙسݨے جو ہندوستان 75 سالیں توں کشمیریاں تے ظلم کریندا پے۔ انہاں آکھیا جو اقوام متحدہ توں مطالبہ اے جو یوکرائن سودھے وݙے تنازعیاں تے نوٹس ڳھدے ویندن اتے رپورٹس تے ایکشن تھیندن پر کیا وجہ اے جو انہاں کوں ہندوستان دی ریاستی دہشت گردی نظر نی امدی۔ انہاں آکھیاجو مقبوضہ کشمیر اچ حریت قیادت پابند سلاسل اے، حریت راہنما علی گیلانی دی میت دی بے حرمتی کیتی ڳی اے۔ارشد سراہی کوں جیل اندر زہر ݙتا ڳے، آسیہ اندرابی جیل اچ بیمار اے، شبیر شاہ دا ٹٻر دھکے کھمدا ودے، یاسین ملک کوں ہک قبر اچ رکھیا ڳے، پچھلے چار سالیں توں انہاں کوں ڈیڈ سیل اچ رکھیا ڳے۔ مشعال حسین ملک آکھیا جو پاکستان یاسین ملک سودھے جیلاں اچ بند حریت قیادت دی رہائی اتے مقبوضہ کشمیر اچ انسانی حقوق دی سنگین خلاف ورزیاں تے عالمی عدالت انصاف ونڄے، یو این اچ متنازعہ حیثیت ختم اتے آبادی اچ تبدیلی تے نویں قرارداد، کشمیر انوائے مقرر کیتا ونڄے۔
اے پی ایچ سی دے راہنما عبدالحمید لون آکھیا جو حکومت پاکستان اتے وزارت اطلاعات دا شکریہ ادا کریندوں جو ہندوستان دے مکروہ چہرے کوں بے نقاب کریندے رہندن۔ انہاں آکھیا جو مسئلہ کشمیر کوں عالمی سطح تے ہک تنازعہ دی حیثیت حاصل اے، ایجھے اچ ہندوستان کینویں مقبوضہ کشمیر دی متنازعہ حیثیت کوں تبدیل کر سڳدے؟
