وزیراعظم محمد شہباز شریف نال آزاد کشمیر دی سیاسی قیادت دی مظفر آباد اچ ملاقات

مظفر آباد۔5فروری (اے پی پی):وزیرِ اعظم محمد شہباز شریف آکھیے جو اںڄ انڄ سیاسی وابستگیاں دے باوجود ملک دی سیاسی قیادت دا مظفر آباد اچ کشمیر کاز کیتے کٹھے تھیوݨ چنڳٰی ڳالھ اے ، گزریل سال ستمبراچ اقوامِ متحدہ دے جنرل اسمبلی دے اجلاس اچ میں خود بھارت دے مقبوضہ کشمیر اچ ظلم توں پوری دنیا دے سامݨے پردا پاتا ، ست ݙھاکیں توں بھارت کشمیر اچ ظلم دی داستان رقم کریندا پئے لیکن او کشمیریاں دےجذبہ حقِ خود ارادیت کوں جھکا نی کرسڳیا ۔ وزیراعظم آفس دے پریس وِنگ موجب وزیرِ اعظم محمد شہباز شریف اے ڳالھ اتوار کوں یومِ یکجہتیِ کشمیر دے موقع تے مظفرآباد اچ آزاد کشمیر دی سیاسی قیادت نال ملاقات اچ آکھی اے ۔ وزیرِ اعظم آکھیے مسئلہ کشمیر اتے آزاد کشمیر دے سارے مسئلیں دا حل اساں ٻہہ تے کڈھیسوں ۔ انہاں آکھیے پاکستان تساݙے نال اے تے ہمیشہ کشمیریاں دے رلے انہاں دی جدوجہد اچ کھڑا رہسی ۔وزیرِ اعظم محمد شہباز شریف آکھیے جے اساں ایویں سیاست کوں ھک پاسے رکھ تے اتحاد نال قومی ایشوز تے کھٹے چلوں تاں او ویلھا پرے کائنی جݙاں سارے مسئلے حل تھی ویسن ۔ اسپیکر آزاد کشمیر قانون ساز اسمبلی اتے وزیرِ اعظم آزاد کشمیر وزیرِ اعظم دی 5 فروری یومِ یکجہتی کشمیر تے مظفر آباد آمد کوں کشمیر کاز کیتے کلیدی قرار ݙیندے ہوئیں ایندا خیرمقدم کیتا۔اجلاس دے شرکاءآکھیے جو وزیرِ اعظم پاکستان دی ایں ݙینھ بذاتِ خود کشمیریاں دے درمیان موجودگی کشمیریاں دے دل اچ آزادی کیتے موجود جذبے کوں مزید اچا کریندی اے ، ایندے توں مقبوضہ جموں و کشمیر، بھارت، پاکستان اتے پوری دنیا اچ پاکستان دی کشمیریاں دی جدوجہد اچ یکجہتی دا پیغام پڄے۔ شرکاءآکھیے آزاد کشمیر دی سیاست کوں ھک پاسے رکھ تے ساری مقامی سیاسی قیادت کشمیر کاز کیتے نہ صرف ھک مٹھ اے بلکہ پاکستان دے ایں جھیڑے اچ اپݨے کشمیری بھیݨ بھراویں دے ساتھ کوں قدر دی نگاہ نال ݙیکھدی اے ۔ وزیرِ اعظم آزاد کشمیرآکھیے پورا کشمیر اڄ یومِ یکجہتی کشمیر دے موقع تے وزیرِ اعظم پاکستان دی مظفر آباد آمد تے دلوں خوش آمدید آکھدے تے اڄ ایں اقدام کشمیریاں دے دل اچ تساݙی قدر کوں مزید ودھائے ۔ انہاں آکھیے بالخصوص موجودہ حکومت اچ وزیرِ اعظم محمد شہباز شریف دی قیادت اچ ایں امر کوں یقینی بݨاوݨ کیتے ذاتی دلچسپی تے کشمیری عوام وزیرِ اعظم کوں خراجِ تحسین پیش کریندن ۔ ملاقات اچ وزیرِ اعظم آزاد کشمیر سردار تنویر الیاس، صدر پاکستان پیپلز پارٹی آزاد کشمیر چوہدی محمد یاسین، صدر پاکستان مسلم لیگ (ن) آزاد کشمیر شاہ غلام قادر، صدر جموں کشمیر پیپلز پارٹی سردار حسن ابراہیم خان شریک تھئن ۔ وفاقی وزراءخواجہ سعد رفیق، رانا تنویر حسین، مریم اورنگزیب، مرتضی جاوید عباسی اتے مشیرِ وزیرِ اعظم قمر الزماں کائرہ وی ایں موقع تے موجود ہن ۔