باصلاحیت پاکستانی نوجوان آئی ٹی دے شعبے اچ آپݨے تئیں روزگار کمیندے پئن جݙاں جو متعلقہ اتھارٹی غیر فعال اے، وزیراعظم شہبازشریف سپیشل ٹیکنالوجی زون اتھارٹی کوں فعال کرݨ کیتے کمیٹی بݨاݙتی

اسلام آباد۔8فروری(اے پی پی) وزیراعظم محمدشہبازشریف اسپیشل ٹیکنالوجی زونز اتھارٹی دی کارکردگی تے کاوڑ کریندے ہوئیں وزیرخزانہ اسحاق ڈار دی سربراہی اچ سپیشل ٹیکنالوجی زون اتھارٹی کوں فعال کرݨ کیتے کمیٹٰی بݨائی اے جیڑھی ھک ہفتے اچ آپݨی سفارشات پیش کریسی ۔وزیراعظم آفس دے میڈیا ونگ توں ٻدھ کوں جاری بیان موجب وزیراعظم دی ِ صدارت اچ اسپیشل ٹیکنالوجی زونز اتھارٹی دے حوالے نال اعلی سطحی اجلاس منعقد تھیا۔ وزیراعظم اتھارٹی دی کارکردگی تے کاوڑ کریندے ہوئیں آکھیے جو ملک اچ موجود وسائل دا مزید ضیان کہیں صورت قبول کائنی ۔باصلاحیت پاکستانی نوجوان آئی ٹی دے شعبے اچ آپݨے تئیں روزگار کمیندے پئن جݙاں جو متعلقہ اتھارٹی غیر فعال اے۔وزیرِ اعظم اسپیشل ٹیکنالوجی زونز اتھارٹی فعال کرݨ کیتے کمیٹی بݨاݙتی اے جیں دے سربراہ وزیرِ خزانہ اسحاق ڈار ہوسن جݙاں جو وزیرِ انفارمیشن ٹیکنالوجی، وزیرِ قانون، وزیرِ سرمایہ کاری، مشیرِ وزیرِ اعظم احد چیمہ، سینیٹر عفنان اللہ اتے چیئرمین سی ڈی اے کمیٹی دے ممبر ہوسن ۔ وزیراعظم ہدایت کیتی جو کمیٹی ھک ہفتے اچ اسپیشل ٹیکنالوجی زونز اتھارٹی کوں فعال کرݨ کیتے اپݨی سفارشات پیش کرے۔ اتھارٹی دے بورڈ آف گورنرز کوں وی وختی فعال کیتا ونڄے۔ بورڈ آف گورنرز اچ متعلقہ شعبے دے ماہرین دی موجودگی یقینی بݨاؤ ۔ وزیرِ اعظم اتھارٹی اچ پلاٹاں تے سرمایہ کاری دی بجائے ایندے اصل مقصد یعنی ملک اچ ٹیکنالوجی دے ودھارے تے توجہ ݙیوݨ دی ہدایت کیتی ۔ انہاں آکھیے سپیشل ٹیکنالوجی زونز اتھارٹی دی اصلاحات تے اینکوں فعال کرݨ دے اقدامات اچ مزید کہیں قسم دا تعطل قبول نہ کیتا ویسی ۔ انہاں آکھیے مسلم لیگ(ن ) اپݨے دورِ حکومت اچ نینگراں کوں آئی ٹی برآمدات ہنر ݙیوݨ دی بنیاد رکھی۔کورونا وائرس دی عالمگیر وبا دے دوران نوجواناں کوں ݙتے ڳئے لیپ ٹاپس توں لکھاں لوکاں روزگار کمایا۔اجلاس اچ وفاقی وزرا اسحاق ڈار، چوہدری سالک حسین، سید امین الحق، مشیرِ وزیرِ اعظم احد چیمہ، معاونینِ خصوصی جہانزیب خان اتے متعلقہ اعلی حکام شرکت کیتی۔ اجلاس کوں اسپیشل ٹیکنالوجی زونز دے حوالے نال تفصیلی بریفنگ ݙیندے ہوئیں ݙسایا ڳئے جو اتھارٹی اچ ایں ویلھے 400 کمپنیاں رجسٹرڈ ہن جیں اچوں 63 فیصد پاکستانی جݙاں جو باقی چین، امریکا ، ترکیہ تے ٻئے ملکاں توں تعلق رکھݨ کھیندن ۔۔وزیرِ اعظم اتھارٹی فعال تے مؤثر طریقے نال ملکی آئی ٹی برآمدات اچ آپݨا کردار نبھاوݨ کیتے اقدامات دے ترجیحی بنیاداں تے نفاذ دی وی ہدایت کیتی۔