دورپار دے علاقیاں اچ تعلیم دے ودھارے، ٻالاں کوں معیاری تعلیم سانڳے “سکول آن ویلز” منصوبہ اہم ثابت تھیسی، وزیراعظم شہباز شریف

اسلام آباد۔28فروری(اے پی پی)وزیراعظم محمد شہباز شریف آکھیے جو ٻالاں کوں جدید اتے معیاری تعلیم ݙتے بغیر ملکی ترقی دا خواب پورا نئیں تھی سڳدا، دورپار دے علاقیاں اچ تعلیم دے ودھارے، ٻالاں کوں معیاری تعلیم سانڳے “سکول آن ویلز” منصوبہ اہم ثابت تھیسی۔ اے ڳالھ انہاں سکول آن ویلز منصوبے دے افتتاح ویلھے آکھی۔ ایں موقع تے وفاقی وزیر تعلیم رانا تنویر حسین اتے ٻعے وی موجود ہن۔ منصوبے دے تحت پہلے مرحلے اچ 8 بساں تے “سکول آن ویلز” منصوبہ اسلام آباد اتے ایندے نال دے علاقیاں اچ ٻالاں کوں موبائل سکولز نال تعلیم ݙیسی جیندے نال دیہاتی ٻالاں کوں تعلیم ݙیوݨ اچ مدد ملسی۔ وزیراعظم آکھیا جو اے موبائل سکولز دیہات اچ علمی انقلاب ڳھن آسن، منصوبے دا دائرہ کار چارے صوبیاں سودھا گلگت بلتستان اتے آزاد کشمیر تئیں کھنݙاوݨ دا جائزہ ڳھدا ویسی۔ وزیراعظم منصوبے کیتے خصوصی ٻݨایاں ڳیاں بساں وی ݙٹھن اتے استاداں تے ٻالاں نال ملین۔