وزیراعظم شہبازشریف مفت اٹا تقسیم کرݨ آلے مرکز اچ بزرگاں تے تریمتاں کیتے خصوصی انتظامات یقینی بݨاوݨ دی ہدایت کیتی

اسلام آباد۔26مارچ(اے پی پی):وزیراعظم محمدشہبازشریف مفت اٹا تقسیم کرݨ آلے مرکز اچ بزرگاں تے تریمتاں کیتے خصوصی انتظامات یقینی بݨاوݨ تے بزرگاں ،تریمتاں اتے بیمارشہریاں کوں ترجیحی بنیاداں تے اٹا ݙیوݨ دی ہدایت کیتی اے ۔ وزیراعظم محمد شہباز شریف اے ہدایات اتوار کوں مفت اٹا تقسیم کرݨ دے عمل اتے انتظامات دا جائزہ گھنݨ کیتے بہاولپور دا دورہ کریندے ہوئیں جاری کیتن ۔ وزیراعظم ڈرنگ سٹیڈیم اتے عباسیہ ہائی سکول اچ قائم مفت اٹا مرکز دا دورہ کیتا ، شہریاں دی شکایتاں تے مسئلے سݨیے تے حکام کوں انہاں کوں حل کرݨ دی ہدایت کیتی ۔ وزیراعظم ایں دوران شہریاں اچ مفت اٹا تقسیم کرݨ دے عمل دا خود جائزہ گھدا ۔وزیراعظم تریمتاں تے بزرگاں سودھے شہریاں نال ایں موقع تے ملاقات کیتی تے انہاں توں انتظامات دے حوالے نال ڳالھ مہاڑ کیتی ۔وزیراعظم شہریاں کوں مفت اٹا ݙیوݨ دے عمل تے اطمینان دا اظہار کیتا ۔دورے دے دوران وزیراعظم بیمارتریمت کوں اٹے دے ݙو تھیلے ݙیوݨ دی ہدایت کیتی ۔ وزیراعظم کوں ݙسایا ڳئے جو بہاولپوراچ اٹا مفت تقسیم کرݨ دے 26 مرکز قائم کیتے ڳئن جتھاں 7 لکھ 21 ہزار مستحق شہریاں اچ مفت اٹا ݙیوݨ دا عمل جاری اے ۔وزیراعظم آکھیے ہر مستحق شہری کوں اٹے دا تھیلہ ملݨا چاہیدے تے کوئی وی بندہ اٹامرکز توں خالی ہتھ نہ ونڄے ۔ وزیراعظم بی آئی ایس پی اچ رجسٹرنہ ہووݨ آلے مستحق لوکاں دی رجسٹریشن کیتے بی آئی ایس پی تے نادرا دے حکام کوں ہدایات وی جاری کیتی۔ وزیراعظم اٹا مرکز اچ قائم ہیلتھ سینٹر دادورہ وی کیتا تے عملے توں سہولتاں تے مریضاں بارے تفصیلات ڳھدیاں ۔وزیراعظم ایں توں پہلے لاہور،سرگودھا اتے قصوراچ اٹا مرکز دے دورے کرچکن ۔