اسلام آباد۔27مارچ (اے پی پی) سپیکرقومی اسمبلی راجہ پرویز اشرف وفاقی وزیر برائے پارلیمانی امور مرتضیٰ جاوید عباسی کوں ہدایت کیتی جو قومی اسمبلی اجلاس، چھل دے علاقیاں توں لوکاں کوں امدادی رقوم ٻھیجݨ بارے رپورٹ منڳوا ڳھنو۔ سنوار کوں قومی اسمبلی اچ سوالاں دے وقفے اچ مولانا عبدالاکبرچترالی دے سوال دے جواب اچ وفاقی وزیر برائے پارلیمانی امور مرتضیٰ جاوید عباسی آکھیا جو ہݨ تئیں ترائے صوبیاں توں این ڈی ایم اے کوں ڈیٹا مل ڳے، ݙو صوبیاں توں ڈیٹا آوݨ باقی اے، صوبیاں ولوں کافی حد تئیں لوکاں کوں امداد ݙتی ڳی اے۔ انہاں آکھیا جو وفاقی حکومت مکمل طور تباہ تھیوݨ آلے مکانات کیتے پنج لکھ روپے اتے جزوی طور تباہ تھیوݨ آلے مکاناں کیتے اݙھائی لکھ روپے امداد ݙیوݨ دا اعلان کیتے۔ سارے صوبیاں توں تفصیل آوݨ دے بعد اے کم پورا کیتا ویسی۔ خیبرپختونخوا اچ فصلاں دے ضیان دے ازالے کیتے ݙاہ ہزار روپے دی رقم ݙے ݙتی ڳی اے۔ ہک ٻے ضمنی سوال دے ولدے اچ مرتضیٰ جاوید عباسی آکھیا جو حکومت بے نظیر انکم سپورٹ پروگرام دے ذریعے 74 ارب توں ودھ دی رقم ادا کیتی اے۔ 118 جاں بحق تھیوݨ آلیاں دے 115 دے لواحقین کوں10 لکھ روپے دی رقم ادا کر ݙتی ڳی اے۔
