اسلام آباد۔27مارچ (اے پی پی) صدر مملکت ڈاکٹر عارف علوی کیپیٹل ڈیویلپمنٹ اتھارٹی (سی ڈی اے) ولوں ملازمہ کوں رہائشی کوارٹر دی الاٹمنٹ اچ صنفی امتیاز رکھݨ تے کاوڑ کیتی اتے وفاقی محتسب دے حکم دے خلاف سی ڈی اے دی درخواست مسترد کر ݙتی اے۔ سنوار کوں ایوان صدر دے پریس ونگ موجب صدرمملکت آکھیا جو معاشرے اچ تریمتیں نال امتیازی سلوک کر تے پاکستان ترقی نی کر سڳدا۔ سی ڈی اے ولوں ہکو سویں کم تے مرد کوں مکان ݙیوݨ اتے تریمت کوں مکان نہ ݙیوݨ دا نقطہ افسوس ناک اے۔ انہاں سی ڈی اے کوں ہدایت کیتی جو او صنفی امتیاز کوں ودھاوݨ آلے اپݨے قانون بہتر ٻݨاون، صنفی امتیاز بانیان پاکستان، اسلام دے منصفانہ طرز عمل اتے آئین دی روح دے خلاف اے۔ سی ڈی اے وفاقی محتسب دے حکم تے عمل کرے اتے تریمت دی شکایت دا ازالہ کرے۔ صدرمملکت ملازمہ کوں کوارٹر الاٹ کرݨ دے وفاقی محتسب دے حکم برقراررکھیندیں ہوئیں آکھیا جو سی ڈی اے ملازمہ (دھوبن) نال امتیازی سلوک کیتے۔
