عدلیہ اچ امید دی لاٹ ݙسی اے، اڄ اسان فیصلہ کرݨے جو قانون و آئین دی پیروی کرݨی اے یا جنگل دا قانون چلسی، وزیراعظم محمد شہباز شریف دا قومی اسمبلی اچ خطاب

اسلام آباد۔28مارچ (اے پی پی):وزیراعظم محمد شہباز شریف آکھیے جو عدلیہ اچ امید دی لاٹ ݙسی اے، اڄ اسان فیصلہ کرݨے جو قانون و آئین دی پیروی کرݨی اے یا جنگل دا قانون چلسی، ڄݙاں عدل تھیندا نظرسی تاں ملک توں خطریاں دے بدل چھٹ ویسن، آئین عدلیہ، انتظامیہ اتے مقننہ دے اختیارات طے کرتے ریڈ لائن لا ݙتی اے، پارلیمنٹ آئین و قانون دے تحت ساری صورتحال ݙیہدے ہوئے فیصلہ کرے، جتھاں نال عدلیہ کوں بلیک میل کرݨ، آئین و قانون کوں نا منݨ آلے لاڈلے کوں ضمانتاں ملدیاں پن، اساں اے کھلواڑ کرݨ دی اجازت نہ ݙیسوں اتے قانون آپ اپݨی راہ ٻݨیسی، اے جمہوریت اتے فسطائیت دی ٻھڑاند اے، قانون نا منݨ آلیآں نال کوئی ڳالھ نئیں تھی سڳدی۔ قومی اسمبلی اچ خطاب کریندے انہاں قوم کوں آئین دی گولڈن جوبلی تے مبارک ݙتی اتے آکھیا جو اے آئین ذاتی پسند و ناپسند توں ہٹ تے تاریخ اچ ہک سڄاکی مثال اے، ملک دا مذہب اسلامی اتے سیاست جمہوری اے، ایں آئین ساݙیاں مذہبی روایات دے نال نال چارے صوبیاں کوں ہکی لڑی اچ جوڑیا ہوئے۔ انہاں آکھیا جو اساں ملک بچاوݨ کیتے اپݨی سیاست دا تے لائی ہؤئی اے، ملکی معیشت کیتے اوکھے فیصلے کیتن، ملک تیھکے اوکھ توں نکل آسی۔ انہاں آکھیا جو اے آئین وݙی جدوجہد نال ٻݨیے اتے اڄ ایندا سنگین مذاق اݙایا ویندا پئے، عدلیہ دے اختیارات دی دھجیاں اݙا ݙتیاں ڳن، ہک لادلے عدلیہ دا مذاق ٻݨایا ہوئے ڄیڑھا عدالتاں اچ پیش نئیں تھیندا، ملک کوں کہیں آعینی و قانونی بحران اچ سٹݨ دی اجازت نا ݙتی ویسی۔