فیصل آباد۔31مارچ(اے پی پی)سرکار دوعالم، فخر موجودات و سرور کائنات حضرت محمد مصطفی ؐ دی زوجہ محترمہ اتے ام المومنین حضرت خدیجۃ الکبریٰ ؓ دا یوم وفات کل ( یکم اپریل 10رمضان المبارک بروزہفتہ ) عقیدت و احترام نال منایا ویسی ۔ حضرت خدیجہؓ مکہ مکرمہ دی ھک معزز، مالدار اتے عالی نسب خاتون ہن جنہاں دا تعلق عرب دے قبیلے قریش توں ہئی ۔ام المومنین حضرت خدیجہ ؓحسن سیرت ،اعلیٰ اخلاق ،بلند کردار،عزت وعصمت اتے شرافت و مرتبہ دی وجہ توں مکہ مکرمہ تے نیڑے علاقیں اچ ”طاہرہ“دے خوبصورت تے پاکیزہ لقب توں مشہور ہن ۔ ام المومنین او پہلی تریمت ہن جنہاں تے اسلام دی حقیقت ساریں توں پہلے روشن تھئی تے انہاں نبی کریم ؐ دی تصدیق کیتی، بے شمار فضائل و مناکب دی بنا تے انہاں کوں تاریخ اسلام اچ ٻہوں اُچا مقام حاصل اے۔ نسب دے لحاظ توں وی آپ سرور کائنات ؐ دی ٻئی ازواج مطہرات دے مقابلے اچ ساریں توں زیادہ قریب ہن ، آپ ؓ مکارم اخلاق دا پیکر جمیل ہن ، عفت و پاکدامنی پاروں زمانہ جاہلیت اچ وی آپ ؓ کوں طاہرہ دے لقب نال یاد کیتا ویندا ہئی ۔ ساریں توں پہلے نبی کریمؐ جیں تریمت نال نکاح فرمایا او سیدہ خدیجۃ الکبریٰ ؓ ہی ہن ، آپ ؓ 10 رمضان المبارک کوں 65 سال دی عمر اچ وفات پاڳیاں ہن۔ آپ ؓ دے یوم وفات دے موقع تے مسیتاں اچ قرآن خوانی کیتی ویسی جݙاں جو آپ ؓ دی دین اسلام کیتے خدمات کوں خراج عقیدت پیش کرݨ کیتے سیمینارز، کانفرنساں تے ٻیاں تقریبات دا انعقاد وی کیتا ویسی۔
