اسلام آباد۔1اپریل (اے پی پی) وفاقی وزیر خزانہ تے محصولات سینیٹر محمد اسحاق ڈار آکھیا جو حج مقدس مذہبی فریضہ اے، حکومت پاکستان عازمین حج کوں سہولتاں ݙیوݨ کیتے پرعزم اے۔ اے ڳالھیں انہاں چھݨ چھݨ کوں حج سکیم 2023 تے پیش رفت دا جائزہ ڳھنݨ کیتے تھیوݨ آلے اجلاس دی صدارت کریندیں ہوئیں آکھی۔ وفاقی وزیر برائے مذہبی امور تے بین المذاہب ہم آہنگی مفتی عبدالشکور، وزیراعظم دے معاون خصوصی برائے محصولات طارق محمود پاشا، سیکرٹری مذہبی امور، سپیشل سیکرٹری خزانہ اتے وزارت خزانہ تے مذہبی امور دے سینئر افسران اجلاس اچ شریک تھیے۔ اجلاس اچ حج 2023 بارے پیشرفت دا جائزہ ڳھدا ڳیا۔ سیکرٹری مذہبی امور اجلاس کوں ݙسیا جو حج کیتے درخواستاں دی وصولی 31 مارچ 2023 کوں حکومتی پالیسی مطابق بند کر ݙتی ڳی ہئی، ریگولر سکیم دے 44190 دے کوٹہ دے ضمن اچ بینکاں اچ 72869 درخواستاں ملین۔ وزیرخزانہ ریگولر سکیم دے تحت ملݨ آلی درخواستاں دی حتمی تعداد بارے بینکاں توں پوری معلومات ڳھن تےمنگل چار اپریل تئیں ݙیوݨ تے زور ݙتا اتے آکھیا جو حکومت پوری معلومات دے بعد تعداد دا جائزہ ڳھن تے فیصلہ کریسی۔
