لاہور۔4اپریل(اے پی پی) سکھ مذہب دے تہوار وساکھی میلہ اتے 324ویں خالصہ ڄمݨ ݙینھ دی تقریبات اچ شرکت کیتے بھارت توں ترائے ہزار دے نیڑے سکھ یاتری 9-اپریل کوں واہگہ بارڈر دے رستے پاکستان داخل تھیسن ۔ ترجمان موجب متروکہ وقف املاک بورڈ دے اعلی حکام تے سکھ رہنما انہاں دا استقبال کریسن ۔ چیئرمین بورڈ حبیب الرحمن گیلانی دا آکھݨ اے جو وساکھی 2023 دے سارے انتظامات مکمل کر ڳھد ڳئن ، بھارت سودھے پوری دنیا توں آوݨ آلے مہماناں دی بہترین مہمان نوازی کیتی ویسی ، انہاں دی سکیورٹی دے خصو صی انتظامات کیتے ڳئن ۔ بورڈ ترجمان موجب ایڈیشنل سیکرٹری شرائنز سارے انتظامات دی نگرانی کریندے پئن ،وساکھی میلہ دی مرکزی تقریب 14اپریل کوں گورودوارہ پنجہ صاحب حسن ابدال اچ تھیسی ۔
