اسلام آباد۔4اپریل(اے پی پی) سپریم کورٹ پنجاب تے خیبرپختونخوا اچ الیکشن التوا دے حوالے نال الیکشن کمیشن دے فیصلے کوں کالعدم قرارݙے ݙتا ۔ عدالت عظمیٰ الیکشن کمیشن دے 22مارچ 2023دے فیصلے کوں کالعدم قرار ݙٰیندے ہوئیں آکھیے 30 اپریل توں 15 مئی 2023 ݙوہیں صوبائی اسمبلیاں دے انتخابات کرائے ونڄن ۔ چیف جسٹس پاکستان عمرعطا بندیال دی سربراہی اچ سپریم کورٹ دے ترائے رکنی بینچ منڳل کوں اتھاں پنجاب تے خیبرپختونخوا اچ صوبائی انتخابات دے حوالے نال کیس دا شارٹ آرڈر جاری کیتا۔ چیف جسٹس عمر عطا بندیال فیصلہ پڑھ تے سݨایا جو عدالت عظمیٰ ھک ݙینھ پہلے سنوار کوں محفوظ کیتا ہئی ۔ فیصلے اچ آکھیا ڳئٖ جو 22 مارچ کوں جݙاں الیکشن کمیشن انتخابات دے التوا دا فیصلہ کتا تاں انتخابی عمل دے پنج مرحلے مکمل تھی چکے ہن ۔ الیکشن کمیشن 8 اکتوبرکوں انتخابات کراوݨ دا فیصلہ غیرآئینی طور تے کیتے ، آئین الیکشن کمیشن دے التوا دی اجازت نی ݙیندا ۔ الیکشن کمیشن دے فیصلے توں 13 ݙینھ دا ویلھا ضائع تھئے ۔سپریم کورٹ پنجاب اتے خیبرپختونخوا اچ الیکشن التوا دے الیکشن کمیشن دا 8 اکتوبر کوں انتخاب کراوݨ دا حکم غیر آئینی قرار ݙیندے ہوئیں پنجاب اچ 14 مئی کوں الیکشن کراوݨ دا حکم ݙتے ۔الیکشن کمیشن 8 اکتوبر2023 کوں انتخابات دے انعقاد دا فیصلہ ݙے تے اختیارات توں تجاوز کیتے۔ سپریم کورٹ آکھیے صدرِ پاکستان دی طرفوں ݙتی ڳئی تاریخ دا فیصلہ بحال کیتا ویندے ۔
