وزیراعظم شہبازشریف دی سی پیک دے ݙاہ سال مکمل تھیوݨ تے چین اتے پاکستان کوں مبارخ

اسلام آباد۔5جولائی(اے پی پی) وزیراعظم شہبازشریف سی پیک دے ݙاہ سال مکمل تھیوݨ تے چین اتے پاکستان کوں مبارخ ݙیندے ہوئیں آکھیے جو چین اتے پاکستان آئرن برادرز ہن، سی پیک ایں آزمودہ سدا بہار بااعتماد سٹرٹیجک کوآپریٹو پارٹنرشپ دا ھک نواں باب اے ۔ وزیراعظم آفس دے میڈیاونگ توں جاری بیان موجب وزیراعظم آکھیے پاکستان اتے  چین دی قیادت اتے عوام کوں مبارخ ݙینداں جو سی پیک کوں ݙاہ سال مکمل تھی ڳئن۔ چین اتے پاکستان آئرن برادرز ہن، سی پیک ایں آزمودہ سدا بہار بااعتماد سٹرٹیجک کوآپریٹو پارٹنرشپ دا ھک نواں باب اے۔ سی پیک چین دے عظیم راہنما شی جن پنگ اتے قائد محمد نوازشریف دے ترقی ساریں کیتے وژن دا شاندار نمونہ اے ۔ بیلٹ اینڈ روڈ منصوبہ صدر شی جن پنگ دی امن، دوستی، معاشی شراکت داری تے بقائے باہمی دی سوچ دا مظہر اے۔ سی پیک صدر شی جن پنگ دا پاکستان دے عوام کیتے تحفہ اے ۔ افسوس اے جو چار سال سی پیک دی راہ اچ رکاوٹ آئی، چین جیہے عظیم دوست تے بے بنیاد الزامات لڳیے۔ سی پیک دے دشمن پاکستان اتے خطے اچ ترقی، امن، خوش حالی دے دشمن ہن، اونی چاہندے جو ساݙے عوام کوں غربت توں نجات ملے۔ سی پیک تے کم دی رفتار ݙوگنا کریندے ، اے غربت ، بے روزگاری اتے معاشی بدحالی دے خاتمے دا منصوبہ اے ۔ انہاں آکھیے بھارت کوں وی سی پیک دے رستے اچ رکاوٹ بݨݨ دے بجائے ایندے ثمرات توں فیدہ چاوݨا چاہیدے ۔ سی پیک توں ایران، افغانستان، وسط ایشیا اتے پورے خطے کوں ثمرات ملسن ۔ اے محض روڈ، ریل، سمندری اتے فضائی رستیں اچ بہتری دا ہی کائنی ، صحت، تعلیم، ہنرمندی اتے ترقی دے عمل اچ حصہ داری دا شاندار منصوبہ اے ۔ سی پیک خطیں اتے علاقیں کوں ہی نی عوام دے دِل جوڑݨ دا وی خوبصورت منصوبہ اے ۔ اے گلوبلائزیشن اچ اکنامک ریجنلائزیشن دا گیم چینجر منصوبہ اے ۔ اے ساݙے خطے اچ عوام دا معیار زندگی بلند کرݨ اتے انہاں غربت توں کڈھ تے امن نال رہݨ دا سفر اے ۔