سی پیک منصوبہ سابق وزیراعظم نواز شریف دی قیادت اچ پروان چڑھیا، گھٹ ویلھے اچ ترقیاتی منصوبے مکمل کرݨ دے ریکارڈ بݨیے ، وزیراعظم شہباز شریف دا تقریب توں خطاب

اسلام آباد۔5جولائی(اے پی پی) وزیراعظم محمد شہباز شریف آکھیے چین پاکستان اقتصادی راہداری (سی پیک) دا منصوبہ سابق وزیراعظم نواز شریف دی قیادت اچ پروان چڑھیا، گھٹ توں گھٹ ویلھے اچ ترقیاتی منصوبے مکمل کرݨ دے ریکارڈ بݨیے ، چینی حکومت اتے کمپنیاں دی طرفوں 25.4 ارب ڈالر دی سرمایہ کاری آئی، سی پیک دے آندے مرحلے کیتے اساکوں نویں عزم نال اڳوں ودھݨا اے تے سپیشل اکنامک زونز دے قیام اتے زراعت، انفارمیشن ٹیکنالوجی اتے معدنی وسائل دی ترقی دے منصوبیں تے کم کرݨا اے ، آئی ایم ایف توں 12 جولائی کوں معاہدہ تھی ویسی ، پاکستان دے ڈیفالٹ دا پرے پرے تئیں کوں ݙر کائنی ،اوکھے ویلھے اچ چینی حکومت اتے دوست ملکاں دے شکرگزار ہیسے تے انہاں دے تعاون کوں ہمیشہ یاد رکھیسوں ۔ اے ڳالھ انہاں سی پیک دی مفاہمتی یادداشت تے دستخطاں دا ھک ݙھاکا مکمل تھیوݨ دے موقع تے منعقدہ تقریب توں خطاب کریندے ہوئیں آکھی اے ۔ ایں موقع تے وفاقی وزرا  اسحاق ڈار، احسن اقبال، مریم اورنگزیب، مولانا اسعد محمود، خرم دستگیر دے علاوہ چینی ناظم الامور پانگ چنشوئی اتے چین و پاکستان دے سینئر حکام وی موجود ہن ۔ وزیراعظم شہباز شریف آکھیے ݙاہ سال پہلے 2013 اچ مسلم لیگ (ن) الیکشن جت تے اقتدار اچ آئی تاں انہاں چینی قیادت نال رل تے اے منصوبہ شروع کیتا ، 5 جولائی 2013 کوں بیجنگ اچ سی پیک دے حوالے نال ایم او یو تے دستخط تھئے تے اے پہلا ایم او یو اے جیں حقیقت دا روپ دھاریا۔ وزیراعظم آکھیے سی پیک دے تحت پاکستان اچ گھٹ ویلھے اچ کول اور ہائیڈل دے پاور پراجیکٹس، اورنج لائن ٹرین تے روڈ انفراسٹرکچر دے منصوبے مکمل کرݨ دا ریکارڈ قائم تھیا، پاکستانی اتے چینی قیادت اتے انجینئرز تے محنت کشاں ݙینھ رات محنت کیتی۔ انہاں سابق وزیراعظم نواز شریف اتے انہاں دی کابینہ و ٹیم دے ارکان کوں سی پیک دا منصوبہ پروان چڑھاوݨ تے خراج تحسین پیش کیتا۔ وزیراعظم چینی قیادت اتے حکومت دا شکریہ ادا کیتاجنہاں اوکھے ویلھے پاکستان دا ساتھ ݙتا۔ وزیر اعظم آکھیے آئی ایم ایف معاہدے کیتے چین اساں کیتے جیڑھا کجھ کیتے اساں اینکوں ہمیشہ یاد رکھیسوں ۔ وزیراعظم آکھیے چینی قیادت دا شکریہ ادا کرݨ سانڳے انہاں کنے الفاظ کائنی ۔ وزیراعظم سی پیک کوں انتہائی شفاف منصوبہ قرار ݙیندے ہوئیں آخھیے جو انتہائی بدقسمتی اتے افسوس دا مقام اے جو سابق حکومت ایں منصوبے اچ نہ صرف کیڑے کڈھیے بلکہ بھونڈے اتے بے بنیاد الزامات لاتے اتے بدگمانی کھنڈائی جیں توں سی پیک دے منصوبیں تے کم سست تھیا تے پاکستان اتے چین دے تعلقات جیڑھے ہمالیہ توں اُچے ہن جنہاں کوں کݙاہیں کوئی دشمن وی کچار کرݨ دا سوچ نہ سڳیا ۔