جمعہ کوں ہر پاکستانی  قرآن کریم دے تقدس دا پرچم گھن تے آپݨے گھر توں نکلے ، وزیراعظم شہباز شریف دی قرآن کریم دی ناموس کیتے ملک گیر احتجاج دی اپیل

اسلام آباد۔6جولائی  (اے پی پی):وزیراعظم محمد شہبازشریف کل (جمعہ کوں)  قرآن کریم دی ناموس کیتے ملک گیر احتجاج دی اپیل کریندے ہوئیں آکھیے ہر پاکستانی  قرآن کریم دے تقدس دا پرچم گھن تے آپݨے گھر توں نکلے تے احتجاج اچ شریک تھیوے ۔ وزیراعظم آپݨے ٹویٹ اچ آکھیے جو پارلیمنٹ دا مشترکہ اجلاس قوم دے احساسات تے جذبات دی بھر پور ترجمانی کریندے ہوئیں قرآن کریم دے تقدس کیتے آپݨے پختہ عزم  دااظہار کریسی تے سویڈن سودھے پوری دنیا تے زور ݙیسی جو اسلام سودھے سارے مذاہب ، مقدس ہستیاں تے عقائد دا احترام کیتا ونڄے۔ نامو س قرآن  ساݙے ایمان داحصہ اے۔ سویڈن سودھے پوری دنیا اچ کتھائیں وی قرآن دی بے حرمتی کہیں مسلمان کوں برداشت کائنی ۔ وزیراعظم آکھیے دنیا دی سارے امن امن پسند، مہذب  اقوام اتے عالمی ادارے  مسلماناں دے دل ݙکھاوݨ ، انہاں کیتے مقدس اتے محترم  شعائر ، علامات دے خلاف نفرت کھنڈاوݨ ، اسلامو فوبیا دے واقعات روکݨ اچ کردار ادا کرن ۔ دنیا کوں شیطان  صفت کرداراں دے حوالے کرݨ عالمی امن کیتے خطرہ اے۔ دنیا کوں بے امنی ، نفرت اتے انتشار دے دوزخ اچ پاوݨ توں روکݨا ہوسی ۔ وزیراعظم آکھیے ایہو سنھیا ݙیوݨ کیتے کل جمعہ 7 جولائی کوں قرآن  کریم دے ناموس کیتے ملک گیراحتجاج  وی تھیسی۔ ریلیاں کڈھیاں ویسن ۔ ہر پاکستانی قرآن کریم دے تقدس دا پرچم گھن تے کل آپݨے گھر توں نکلے تے احتجاج اچ شریک تھیوے۔