وزیر خارجہ بلاول بھٹو زرداری دا او آئی سی دے سیکرٹری جنرل نال ٹیلیفونک رابطہ،  پاکستان اچ یوم تقدس قرآن مݨاوݨ بارے ݙسایا

اسلام آباد۔25جولائی(اے پی پی) وزیر خارجہ بلاول بھٹو زرداری اسلامی تعاون تنظیم (او آئی سی) دے سیکرٹری جنرل حسین براہیم طحہ نال ٹیلی فون تے ڳالھ کیتی ۔ منڳل کوں دفتر خارجہ موجب اے ٹیلی فون کال سویڈن اتے ٻئے یورپی ملکاں اچ قرآن پاک دی بے حرمتی دے پے در پے واقعات دے پس منظر اچ کیتی ڳئی اے ۔ وزیر خارجہ توہین آمیز کارروائیاں دی مذمت کیتی جیڑھی جو بین الاقوامی قوانین دی صریح خلاف ورزی ہن ۔ انہاں او آئی سی دے سیکرٹری جنرل کوں 6 جولائی 2023 کوں پاکستان دی پارلیمنٹ دے مشترکہ اجلاس اچ منظور کیتی ڳئی قرارداد اتے7 جولائی 2023 کوں پاکستان اچ یوم تقدس قرآن دے مناوݨ بارے ݙسایا جیڑھا جو تحفظ قرآن کیتے پاکستان دے عوام دی امنگاں دی عکاسی کریندے ۔ وزیر خارجہ ایں ڳالھ دی تعریف کیتی اے جو او آئی سی سیکرٹری جنرل دی سرپرستی اچ انہاں قابل مذمت کارروائیاں دا وختی جواب ݙیندی پئی اے ، انہاں 2 جولائی 2023 کوں جدہ اچ او آئی سی دی ایگزیکٹو کمیٹی دے تھیوݨ آلے غیر معمولی اجلاس اتے اجلاس دے بعد جامع اعلامیہ جاری کرݨ تے او آئی سی دی تعریف کیتی۔ وزیر خارجہ ایں معاملے تے ہنگامی وزارتی اجلاس دے انعقاد کیتے او آئی سی دے فیصلے دا خیر مقدم کیتے اتے سیکرٹری جنرل کوں ایں سلسلے اچ ایران، سعودی عرب اتے ترکی دے وزرائے خارجہ نال تھیوݨ آلی ٹیلی فونک رابطہ بارے ݙسایا ۔ او آئی سی دے سیکرٹری جنرل اسلامو فوبیا نال نبݨݨ تے انسداد کیتے پاکستان دیاں کوششاں دی تعریف کریندے ہوئیں اقوام متحدہ اچ ایں سلسلے اچ پاکستان دے اہم کردار دی تعریف کیتی ۔ وزیر خارجہ سیکرٹری جنرل کوں یقین ݙیوائے جو پاکستان اسلامو فوبیا دی قابل مذمت لہر کوں روکݨ کیتے او آئی سی دے سارے اقدامات اچ فعال طور تے حصہ گھنݨ کیتے تیار اے ۔