صدر مملکت  ڈاکٹر عارف علوی  دی بے گناہ فلسطینیاں دے خلاف طاقت دے وحشیانہ استعمال دی مذمت

اسلام آباد۔1نومبر(اے پی پی):صدر مملکت ڈاکٹر عارف علوی بے گناہ فلسطینیاں دے خلاف طاقت دے وحشیانہ استعمال دی مذمت کریندے ہوئیں محاصرہ ختم کرݨ تے فلسطینیاں کیتے انسانی ہمدردی دی بنیاد تے راہداری کھولݨ دا مطالبہ کیتے تے عالمی برادری تے زور ݙتے جو او غزہ اچ جاری اسرائیلی جارحیت دی مذمت کرے۔ انہاں آکھیے پاکستان کوں فلسطینی شہریاں دے خلاف اسرائیلی جارحیت تے شدید تشویش اے جئیں اچ تریمتاں ، ٻال تے ٻڈھیں سودھے ہزاراں لوک شہید تھی چکئن ۔ انہاں آکھیے پاکستان یروشلم سودھے سارے مقبوضہ عرب علاقیں توں اسرائیل دے مکمل انخلاء دے نال نال فلسطینیاں کیتے ھک آزاد وطن دے قیام دا حامی اے جیں دا دارالحکومت القدس شریف ہووے۔ صدر مملکت اے ڳالھ ٻدھ کوں ایوان صدر اچ سفارتی اسناد پیش کرݨ دی تقریب اچ کیتے ۔ اردن دے نامزد سفیر ڈاکٹر مین اے ایم  خریاسات، ہولی سی دے نامزد سفیر آرچ بشپ جرمنو  پینیموٹ اپوسٹولک نونسیو، جمہوریہ چیک دے نامزد سفیر لاڈیسلاو سٹین ہوبل، برونائی دارالسلام دے نامزد ہائی کمشنر کرنل (ر) پنگیرن حاجی کمال باشا اتے پاکستان اچ قطر دے نامزد سفیر علی مبارک الخاطر صدر مملکت ڈاکٹر عارف علوی کوں آپݨی سفارتی سنداں پیش کیتیاں تے بعد اچ انہاں دے نال انڄ انڄ ملاقات کیتی ۔ ایں موقع تے ڳالھ مہاڑ کریندے ہوئیں صدر آکھیے پاکستان فلسطین دی صورتحال تے نظر رکھی ہوئی اے تے فلسطینی عوام دے ناقابل تنسیخ حقوق دی بحالی چاہندے۔