موسمیاتی تبدیلی عالمی ماحول کوں متاثر کریندی پئی اے ، چھل پاروں پاکستان دا وݙا معاشی ضیان تھئے، وزیر خارجہ جلیل عباس جیلانی دا پری کاپ 28 دے حوالے نال سیمینارتوں خطاب

اسلام آباد۔2نومبر(اے پی پی) وزیر خارجہ جلیل عباس جیلانی آکھیے موسمیاتی تبدیلی عالمی ماحول کوں متاثر کریندی پئی اے ، چھل پاروں پاکستان دا وݙا معاشی ضیان تھئے۔پاکستان تے متحدہ عرب امارات  دے بھراویں دا تعلقات ہن، یو اے ای گزریل سال پاکستان دے چھل متاثرین دی مدد کیتی۔ اے ڳالھ انہاں پری کاپ 28 دے حوالے نال سیمینار توں خطاب اچ آکھی اے ۔ سیمینار توں وفاقی وزیر اطلاعات و نشریات مرتضیٰ سولنگی اتے ٻئی اہم شخصیات وی خطاب کیتا۔ نگراں وزیر خارجہ جلیل عباس جیلانی اڄوکے سال دے چھیکڑ اچ دبئی اچ تھیوݨ آلی کاپ 28 اچ تعمیری کردار نبھاوݨ سانڳے پاکستان دی آمادگی دا اظہار کریندے ہوئیں نویں نسل دے روشن مستقبل کوں محفوظ اتے یقینی بݨاوݨ کیتے وختی اصلاح دی لوڑھ تے زور ݙتے۔ انہاں ایں مسئلے دے حل اچ حصہ پاوݨ کیتے پاکستان دی آمادگی تے زور ݙتے۔انہاں عالمی سطح تے موسمیاتی تبدیلی نال نبݨݨ سانڳے گلوبل سٹاک ٹیک دے اہم کردار تے روشنی پاتی جیڑھی جو COP28 دی کامیابی سانڳے ٻہوں اہم اے ۔ سول سوسائٹی کولیشن فار کلائمیٹ چینج (سی ایس سی سی سی) یونائیٹڈ اسٹیٹس انسٹی ٹیوٹ آف پیس اتے پاکستان اچ متحدہ عرب امارات دے سفارت خانے دے تعاون نال اسلام آباد اچ پری کاپ 28 سیمینار دی میزبانی کیتی۔ سیمینار اچ سرکاری حکام، ماہرین، سول سوسائٹی دے نمائندے تے میڈیا دے نمائندیں شرکت کیتی تاں جو او آندے مہینے دبئی اچ شروع تھیوݨ آلی کاپ 28کانفرنس اچ پاکستان دے کردار کیتے حکمت عملی بݨاوݨ ۔