فلسطین دے دفاع کیتے مسلم حکمران ہک مٹھ، اسرائیلی جارحیت اتے بربریت دی سخت مذمت

ریاض۔11نومبر(اے پی پی):عرب اتے اسلامی ملکاں دے سربراہان غزہ اچ 5 ہفتے توں جاری اسرائیلی جارحیت اتے وحشیانہ حملیاں کوں سہوݨ آلے فلسطینی عوام نال یکجہتی کریندے 11ہزار فلسطینیاں دے قتل عام دی شدید مذمت کریندے مسئلے دے فوری حل اتے انسانی بحران کوں مکاؤݨ کتیے عملی اقدامات تے زور ݙتے۔ سعودی عرب دی اڳواݨی اچ مشترکہ عرب اسلامی غیر معمولی سربراہی اجلاس تھئے جیندے اچ غزہ دی وڳڑدی صورتحال اتے مستقبل دی حکمت عملی تے ڳالھ مہاڑ تھئی۔ سعودی ولی عہد شہزادہ محمد بن سلمان غزہ اچ اسرائیلی فوجی کارروائیاں فوری بند کرݨ دا مطالبہ کریندے صورتحال کوں انسانی تباہی قرار ݙتے جو ایندے نال عالمی برادری اتے اقوام متحدہ دی سلامتی کونسل اسرائیل ولوں عالمی انسانی قوانین دی سنگین خلاف ورزیاں رکواوݨ اچ ناکام ݙسدن۔ انہاں آکھیے جو 1967 دی بنیاد تے فلسطینی ریاست دے قیام سودھا اسرائیلی قبضے اتے غیر قانونی اسرائیلی وستیاں مکوݨ اتے فلسطینی عوام دے حقوق دی بحالی ضروری اے۔ فلسطین دے صدر محمود عباس اسرائیلی مظالم اتے غزہ دی صورتحال ݙسیندے اسرائیلی جارحیت، مقدس مقامات تے قبضے اتے بے حرمتی مکاؤݨ دا مطالبہ کیتے۔ ایران دے صدر ابراہیم رئیسی آکھیا جو فلسطین اچ تاریخ دے بدترین جرائم تھیندے پن، سارا عالم اسلام ایں مسلے دے حل کیتے ہک تھیو ونڄے، او آئی سی مسلم ممالک وچال اتحاد کیتے کردار ادا کرے، صیہونی حکومت دا غزہ اچ قتل عام اتے تباہی سفاکیت اتے عالمی قوانین دا مذاق اݙاوݨ توں سوا کڄھ نئیں، غزہ ڄق دی سب توں وݙی جیل اے، صرف 5 ہفتے اچ غزہ اچ 11 ہزار نہتے شہری ماریے گئن، فلسطینی شہریاں دا قتل عام بند کرتے انسانی ہمدردی دی راہداری کھولی ونڄے۔ مصر دے صدر عبدالفتاح السیسی آکھیا جو قتل محاصرے اتے فلسطینیاں دی زبردستی نقل مکانی نال اجتماعی سزا دا تصور قابل مذمت اے جیکوں اپݨا دفاع نئیں آکھیا ونڄ سڳدا، اے بربریت فوری روکی ونڄے۔ ترکی دے صدر رجب طیب اردگان آکھیے جو غزہ اچ اسرائیلی بمباری اتے معصوم شہریاں خاص کر ٻالاں کوں نشانہ ٻݨاوݨ تے ڄق دی خاموشی افسوسناک اے، اسرائیلی حکام غزہ اچ مظالم دے ذمہ دار ہین، مسئلے دے پر امن حل کیتے عالمی امن کانفرنس سݙی ونڄے۔ قطر دے امیر شیخ تمیم بن حمد الثانی عالمی برادری کوں فلسطین دے بحران کوں مکاوݨ کیتے فوری اقدامات کرݨ تے اسرائیل کوں جارحیت توں روکݨ تے زور ݙتے۔ اسلامی ملکاں دے شریک سربراہان ڄڳ خاص کر عالمی انسانی حقوق دیاں تنظیماں جیویں اقوام متحدہ کوں آکھیے جو او فلسطینیاں دے حق، امن اتے اسرائیلی کوں جارحیت توں باز رکھݨ کیتے عملی اقدامات کرے اتے اسرائیل کوں جنگی جرائم توں فوری روکیا ونڄے۔