اسلام آباد۔16نومبر(اے پی پی):نگراں وفاقی وزیرخزانہ، محصولات واقتصادی امور ڈاکٹر شمشاد اختر آکھیے جو پاکستان خطہ اتے ایشیا اچ وݙا اقتصادی کھلاڑی ٻݨݨ کیتے سارے تقاضے پورے کریندا پئے، پی آئی اے دی نجکاری کوں تیکھا کرݨ کیتے اقدامات جاری ہین، اہم بنیادی ڈھانچہ اتے زراعت، معدنیات و انفارمیشن ٹیکنالوجی سودھا نظرانداز پیداواری شعبیاں اچ نویں سرمایہ کاری سانڳے خصوصی سرمایہ کاری سہولت کونسل (ایس آئی ایف سی) ٻݨائی ڳئی اے۔ اے ڳالھ انہاں اسلام آباد اچ کونٹ شیلز کانفرنس ولوں فیوچر سمٹ نال خطاب کریندے آکھی۔ انہاں آکھیا جو آئی ایم ایف نال سٹاف سطح دے معاہدے نال ملکی معیشت و معیشت دے استحکام کیتے حکومتی کوششاں تے چنڳے اثرات پوسن۔ آئی ایم ایف اتے ݙوطرفہ شراکت داراں دے ڳانݙھے نال معیشت کوں ولا پٹڑی تے ڳھن آوݨ اچ مدد ملی اے، عالمی بینک دی رپورٹ دے مطابق 2047 تئیں ساݙی معیشت 2 ٹریلین ڈالر تئیں پج سڳدی اے ڄیڑھی ایں ویلے 350 ارب ڈالر اے ٻھل ایندے کیتے پائیدار اقتصادی پالیسیاں اتے اوکھیاں ڈھانچہ جاتی اصلاحات جاری رکھنا، پائیدار ترقی و نمو کیتے معیشت اچ جدت ڳھن آوݨ ٻہوں ضروری اے، زرعی اتے برآمدی شعبے کوں وی ترقی ݙیوݨی ہوسی۔ ملک اچ کلی معیشت دے استحکام اتے متوازن نمو سانڳے کوششاں جاری رکھسوں۔
