پاکستان دا اقوام متحدہ اچ جارحانہ اسرائیلی حملے تیکھے بند کرݨ اتے فلسطینیاں دے تحفظ کیتے جامع طریقہ کار اپناوݨ دا مطالبہ

اقوام متحدہ ۔18نومبر(اے پی پی) پاکستان اقوام متحدہ اچ جارحانہ اسرائیلی حملے تیکھے بند کرݨ اتے فلسطینیاں دے تحفظ کیتے جامع طریقہ کار اپناوݨ دا مطالبہ کریندے زور ݙتے جو غزہ اچ انسانی بحران توں بچݨ کیتے فوری امدا خاص کر خوراک و ادویات اتے ٻیا امدادی سامان تیکھے پچاوݨ دی لوڑھ اے۔ اے مطالبہ اقوام متحدہ اچ پاکستان دے مستقل مندوب منیر اکرم اقوام متحدہ اچ معمول دے اجلاس اچ 17 مختلف ملکاں جیندے اچ الجزائر، بولیویا، چین، کیوبا، مصر، اریٹیریا، ایران، سعودی عرب، لیبیا، نکاراگوا، نائیجیریا، روس، سری لنکا، شام، وینزویلا اتے زمبابوے شامل ہین،  دی نمائندگی کریندے ہوئے کیتے۔ انہاں اقوام متحدہ کوں آکھیے جو او فوری اینڄھا طریقہ کار طے کرے جیندے نال نا صرف فلسطینیاں دا تحفظ ممکن تھیوے ٻھل اقوام متحدہ دیاں قرارداداں اتے عالمی قوانین دے مطابق انہاں کوں ویلے تے انسانی امداد وی پچائی ونڄ سڳے ڄݙاں جو ایں تنازع دے حل سودھا امن کوں وی یقینی ٻݨایا ونڄے۔ انہاں آکھیا جو غزہ دے مظلوم لوک اقوام متحدہ دو اکھیں ٻھالی ٻیٹھن جو انہاں کوں محصور علاقہ اچ ودھدیاں اموات اتے تباہی توں بچایا ونڄے۔