ٻال قوم دا ساریں توں وݙا قیمتی سرمایہ تے ایندے مستقبل دی ضمانت ہن، صدر ڈاکٹر عارف علوی دا عالمی یوم اطفال تے سنھیا

اسلام آباد۔20نومبر(اے پی پی) صدر مملکت ڈاکٹر عارف علوی آکھیے ٻال کہیں وی قوم دا ساریں توں قیمتی سرمایہ  تے ایندے مستقبل دی واحد ضمانت ہن ، پاکستان اپݨے ٻالاں دی طرفوں آپݨی ذمے واریاں نال پوری طرح واقف اے تے دستور پاکستان اتے اقوام ِمتحدہ دے ٻالاں دے حقوق دے کنونشن موجب ٻالاں دی جامع ترقی، اندراجِ پیدائش ، تعلیم، صحت ، شرکت، وقار اتے تحفظ یقینی بݨاوݨ سانڳے ساریاں کوششاں کریندا پئے ،سماجی انصاف اتے مساوات ہی او بنیاداں ہن جنہاں تے ھک صحت مند معاشرے دا ڈھانچہ استوار کیتا ونڄݨا چاہیدے ، ایں سانڳے اساکوں معاشری سطح تے ھک تحریک دی لوڑھ اے ، کمیونٹیز تے خاندانوں کوں ساݙی قوم دے مستقبل کیتے اپݨا کردار ادا کرݨا ہوسی۔ عالمی یومِ اطفال تے صدر مملکت ڈاکٹر عارف علوی اپݨے سنھیے اچ آکھیے جو اڄ عالمی یوم اطفال’’ہر ٻال کیتے ہر حق‘‘دے عنوان دے تحت منایا وینداپئے،اڄ دے ݙینھ اساں ٻالاں دے حقوق اتے بہبود سانڳے آپݨے عزم دا اعادہ کریندوں ،پاکستان اقوام ِمتحدہ دے ٻالاں دے حقوق دے کنونشن سودھے انسانی حقوق دے ست بنیادی کنونشن تے دستخط کر چکیے،  پاکستان ٻالاں کوں ملھ گھنݨ ، جسم فروشی ، پورنوگرافی اتے جنگاں اچ ٻالاں دی شمولیت متعلق اختیاری پروٹوکول دی وی توثیق کر چکیے، اقوام ِمتحدہ دے ٻالاں دے حقوق دے کنونشن تے ھک دستخط کنندہ دے طور تے پاکستان ٻالاں دے حقوق دی وکالت، تحفظ اتے ودھارے اچ صفِ اول اچ شامل اے ۔ انہاں آکھیے ٻال دی ذہنی و جسمانی نشوونما اچ کمی ، غذائیت دی قلت اتے معیاری تعلیم تے صحت دیاں سہولتاں تئیں رسائی عدم رسائی جیہے کئی چیلنجز دا شکار ہن ۔ ایں توں علاوہ انہاں کوں ٻالاں دی سمگلنگ، شادی، چائلڈ لیبر، جسمانی سزا، بدسلوکی، قانون نال تصادم اتے ضیان ݙیوݨ آلیاں سماجی روایات جیہے تحفظ دے مختلف چیلنجز دا وی سامݨا اے ۔انہاں آکھیے پاکستان آئی سی ٹی چائلڈ پروٹیکشن ایکٹ 2018 ء ،  جووینائل جسٹس سسٹم ایکٹ  2018 ء ،  زینب الرٹ ریسپانس اینڈ ریکوری ایکٹ2020 ء تے ٻالاں دی ملازمت دے  ایکٹ 1991 ء اچ پیشیں دی فہرست اچ’’چائلڈ ڈومیسٹک لیبر‘‘ کوں رلاوݨ سودھے مختلف قانون بݨائن ۔