موسمیاتی تبدیلی دے مضر اثرات نال نبڑݨ کیتے قلیل ، وسط اتے طویل مدتی فریم ورک ٻݨائے ونڄن،کاپ۔28 اچ پاکستان دا مؤقف بھرپور طریقہ نال پیش کیتا ونڄے، نگران وزیراعظم انوار الحق کاکڑ

اسلام آباد۔20نومبر  (اے پی پی) نگران وزیرِ اعظم انوار الحق کاکڑ ملک اچ کاربن کریڈٹس دی تشکیل اتے تجارت کیتے جامع پالیسی فریم ورک ٻݨاوݨ کیتے موسمیاتی تبدیلی کونسل دے ماہرین دی کمیٹی ٻݨاوݨ دی منظوری ݙتی اتے آکھیا جو موسمیاتی تبدیلی پاکستان سویں ترقی پذیر ملکاں کیتے قومی سلامتی دا مسئلہ اے، موسمیاتی تبدیلی دے مضر اثرات نال نبڑݨ کیتے قلیل ، وسط اتے طویل مدتی فریم ورک ٻݨائے ونڄن۔ موسمیاتی تبدیلی دے مضر اثرات نال نبڑݨ کیتے قلیل ، وسط اتے طویل مدتی فریم ورک ٻݨائے ونڄن،کاپ۔28 اچ پاکستان دا مؤقف بھرپور طریقہ نال پیش کیتا ونڄے۔سنوار کوں وزیراعظم آفس دے میڈیا ونگ توں جاری بیان موجب نگران وزیراعظم انوار الحق کاکڑ دی صدارت پاکستان موسمیاتی تبدیلی کونسل دا ݙوجھا اجلاس تھیا۔ اجلاس اچ نگران وفاقی وزراء احمد عرفان اسلم، شمشاد اختر، جلیل عباس جیلانی، عمر سیف، کوثر عبدالملک، سمیع سعید، محمد علی، وزیرِ اعلیٰ گلگت بلتستان گلبر خان، چاریں صوبائی حکومتاں دے نمائندے، سول سوسائٹی، این جی اوز، موسمیاتی تبدیلی دے بین الاقوامی اداریاں دے نمائندے اتے متعلقہ اعلیٰ افسر شریک تھیے۔ اجلاس اچ کونسل کوں ایں مہینے متحدہ عرب امارات اچ تھیوݨ آلی 28ویں کانفرنس آف پارٹیز (کاپ۔28) اچ پاکستان دی شمولیت، ایجنڈے اتے لائحہ عمل بارے تفصیلی ݙسیا ڳئیا۔