اسلام آباد۔7دسمبر(اے پی پی سرائیکی نیوز سروس ۔ڈاکٹر سعدیہ کمال) ادی نیناں دا آکھݨ ہا جو افسانہ نگاری اچ جھتاں بھرا اپݨا ہک مقام بݨائی کھڑے ہن اُتھاں اساݙی وسوں دی تریمت وی پچھوں تے نی رہی ہمیش توں ٻانہہ ٻیل بݨی آندی اے۔ سرائیکی تریمتیں دے افسانہ نگاری تے دید بھنواؤں تاں ساکوں سُدھ پوندی اے جو 70دا ݙہکا ادب اچ سرائیکی تریمتیں دا آوݨ ہک نواں موڑ ہا. افسانہ نگاری اچ مسرت کلانچوی، بتول رحمانی، بشریٰ رحمان، غزالہ حمداݨی، بشریٰ قریشی، نجمہ کوکب، سیدہ افضل تے ٻیاں ݙھیر ساریاں بھیݨیں اپݨیں لکھتیں نال اپݨے آپ کوں نشابر کیتا ـ افسانہ نگاری توں ہی ساکوں گھر، وستی ویڑھے، چودیواری اچ تھیوݨ ولے ݙکھ در، ݙڈھپ، جبر، ظلم، استحصال، ولوانجھ ناانصافیاں، جگیرداری تے ٻئے ڈھیر مسئلے مسائل پتا چلیے. ادی بتول رحمانی مذہبی، تہذیبی، نفسیاتی تے معاشرتی موضوعات، ریتی رواج، تے ثقافت کوں اپݨے لکھتیں اچ نشابر کیتا ـبتول رحمانی دا ڄم پل تے ابتدائی تعلیم بہاولپور شہر دا ہئ. ادی بتول رحمانی نکی عمر اچ لکھݨ پڑھݨ شروع کیتا ہا تے لکھتیں دا منڈھ اردو اچ کیتا ہا اونہاں دا پہلا افسانہ “لہریں” ہا جیڑھا 3سال بعد اخبار اچ چھپیا 1983 اچ انہاں دا اردو افسانیں دا مجموعہ “چوتھی سمت” چھپیا ہا بھانویں جو او ہک سائنس دی طالبہ ہن کیمسٹری اچ PHDکریندے پئے ہن ول وی انہیں اپݨی ماء ٻولی ترجیح ݙتی تے سرائیکی افسانے لکھݨ شروع کیتے 1994اچ انہاں دا ݙوجھا مجموعہ “سانجھ” 20سرائیکی افسانیں تے مشتمل اے تے ہک اݨ چپھیل کتاب “کچ دا گھر” اے ـ بتول رحمانی 47 سال دی عمراں اچ 2002کوں جھوک لݙا ڳئے ہن. بھانویں جو انہاں دی وفات کوں ݙوں ݙھاکے گزر ڳئین پر ول وی انہاں دے افسانیاں اچ جیڑھے موضوعات کوں نشابر کیتا ڳیا ہا او اج دے جدید دور اچ وی ہن پئے تے لکھاری انہاں دی اہمیت کوں نشابر کریندے پئن۔ادی نیناں ٻیا آکھے جو بتول رحمانی دا پہلا سرائیکی افسانہ “روہی روپ ” اے جݙاں اساں اونکوں پڑھیے تاں اوندے ساکوں روہی تے شھر دے سانجھ سلوک دا فرق پتا چلدے کے روہی دی ریت دے ٹٻیاں دے سݨھپ، اٹھاں دی قطار دے نال نال ریت رواج، ݙکھ سکھ، ثقافت ، حسن، سانجھ، پریت ملی جیڑھی شاھراں اچ ٻہوں گھٹ ملدی اے شھریں دا وسݨ وسیب تے وستی دی حیاتی دی بہوں سوہݨے طریقے تے اسان لفاظی نال بیان کیتے ول اساں انہاں افسانہ ساول ݙیکھوں تاں اوندے اچ ہک ایکڑیل افسر تے چپڑاسی دا حال حویلہ ملدے اوندے اچ شجر کاری تے وطن دی محبت کوں نشابر کیتا ڳئے ـجیڑے اڄوکے دور دی وی لوڑھ اے. امانت افسانے اچ دھیاں دی تعلیم دی اہمیت کوں ٻہوں سوہݨے طریقے نال نشابر کیتنیں. ادی نیناں دا عالمی اردو کانفرنس اچ آکھݨ ہا جو بتول رحمانی ہک استاد، براڈکاسٹر ، آرٹسٹ تے متحرک سماجی ورکر ہئی ۔ جے حیاتی ساتھ ݙیندی دا ٻیا وی لکھتاں سامݨے آندیاں تے شکر گزار ہیں کراچی آرٹس کونسل دے انھاں کوں یاد کیتس۔
