سرحد پارتوں دہشت گردی کوں برداشت کائنا کیتا ویسی، حکومتی خرچے ڳھٹ، ایف بی آر کوں ڈیجیٹائز،بجلی تے گیس دی چوری دا خاتمہ کریسوں، وفاق اتے صوبیاں کوں رَل تے چیلنجز نال نبڑݨا پوسی، وزیراعظم

اسلام آباد۔20مارچ  (اے پی پی) وزیراعظم محمد شہبازشریف ملکی سرحداں کوں  دہشت گردی دے خلاف  ریڈلائن قرار ݙیندیں ہوئیں آکھیا جو سرحد پار توں تھیوݨ آلی دہشت گردی کو ٻیا برداشت کائنا کیتا ویسی۔ ہمسائے ملک دی سرزمین دہشت گردی کیتے استعمال نی تھیوݨی چاہیدی، ہمسائے ملک اساݙے نال ٻہہ تے اتے دہشت گردی دے خاتمے کیتے لائحہ عمل ٻݨایا ونڄے۔ معیشت کوں مستحکم کرݨ اتے قرضیاں توں جان چھڑاوݨی اے۔  2400 ارب روپے دے محصولات  دے معاملے عدالتاں اچ یا ٹریبیونلز اچ زیرسماعت ہن، چیف جسٹس نوٹس ڳھن تے میرٹ تے انہاں دا فیصلہ کرن۔ ایف بی آر کوں 100فیصد ڈیجیٹائزکیتا ویسی۔ جیڑھے لوک ٹیکس نی ݙیندے انہاں کوں ٹیکس دائرے اچ ڳھن آسوں۔ حکومتی خرچے ڳھٹ کرݨ کیتے کمیٹی ٻݨا ݙتی ڳئی اے۔ بجلی تے گیس چوری دا خاتمہ کریسوں۔ اے ڳالھیں بدھ کوں وزیراعظم محمدشہبازشریف وفاقی کابینہ دے اجلاس اچ ڳالھ مہاڑ کریندیں ہوئیں آکھی۔   وزیراعظم شہباز شریف آکھیا جو وفاقی کابینہ دا اے پہلا باقاعدہ اجلاس اے جئیں اچ سارے وفاقی وزرا اتے سرکاری افسراں کوں خوش آمدید آکھداں۔