اساکوں اپݨے خوشحال کل سانڳے اڄ ٻوٹے رہاوݨے ہوسن ، حکومت دی ’’ گرین پاکستان ‘‘ مہم اچ شراکت دار بݨو،وزیراعظم داصوبائی حکومتاں، سول سوسائٹی اتے سارے شہریاں تے زور

اسلام آباد۔21مارچ(اے پی پی) وزیراعظم محمد شہباز شریف پاکستان اچ جنگلات دا رقبہ ودھاوݨ تے جنگلات کوں محفوظ بݨاوݨ سانڳے حکومت پاکستان دے بھرپورعزم  دااعادہ کریندے ہوئیں صوبائی حکومتاں، سول سوسائٹی اتے سارے شہریاں تے زور ݙتے جو او حکومت دی’’گرین پاکستان‘‘مہم اچ شراکت دار بݨن ، اساکوں آپݨے خوشحال کل سانڳے اڄ ٻوٹے رہاوݨے ہوسن ۔ جنگلات دے جڳ ݙیھاڑ دے موقع تے آپݨے سنھیے اچ وزیراعظم  آکھیے پاکستان اچ وی دنیا دے ٻئے ملکاں وانڳوں جنگلات  داجڳ ݙیھاڑ منایا ویندا پئے ۔ اڄوکے سال ایں ݙینھ دا موضوع ’’ جنگلات اتے اختراع : ھک بہتر دنیا سانڳے نواں حل  ‘‘ اے جوجنگلات کوں ودھدے ہوئے خطریں نال نبݨݨ سانڳے تکنیکی اختراعات کوں  بروئے کارگھن آوݨ دی لوڑھ کوں اجاگر کریندے ۔  اختراعات دے ذریعے جنگلات کوں بہتر طریقے نال محفوظ تے پائیدار بنیاداں تے برقرار  رکھیا تے جنگلات دی کٹائی، انھاں اچ قائم  مساکن دی تباہی اتے ماحولیاتی تبدیلی دے خطریں کوں گھٹ کیتا ونڄ سڳدے ۔وزیراعظم آکھیے پاکستان دے  کل رقبے دے  5 فیصد توں وی گھٹ تے جنگلات ہن تے ہر سال انھاں جنگلات  دا تقریباً 1.5فیصد رقبہ گھٹ تھیندا پئے ۔ ایندے پاکستان  دے حیاتیاتی تنوع ، ماحولیات اتے زراعت تے گھاٹے اثرات پمدے پئن ۔